Skotið á hús Rihönnu í Beverly Hills

Skömmu síðar var kona á fertugsaldri handtekin grunuð um verknaðinn. Rihanna var heima þegar árásin var gerð en hana sakaði ekki og engan annan heldur. Óljóst er hvort unnusti hennar A$AP Rocky hafi verið á staðnum eða börnin þeirra þrjú.

Skothylki úr árásarriffli fundust fyrir utan heimilið og konan sem grunuð er um verknaðinn er sögð hafa skotið á húsið úr bíl sínum áður en hún flúði af vettvangi. Hún var handtekin í bílnum í um tólf kílómetra fjarlægð frá heimili Rihönnu en óljóst er hvað henni gekk til.

A$AP Rocky, sem er þekktur rappari og plötuútgefandi hefur sjálfur komist í kast við lögin áður. Í september í fyrra var hann sýknaður af ásökun um að hafa skotið úr byssu í átt að fyrrverandi vini sínum.