„Bara besti leikurinn sem ég hef séð hjá Kristó í nokkur ár“

Kristófer var með 17 stig, 17 fráköst og 8 stoðsendingar í þessum nauma sigri á KR-ingum.

Stefán Árni Pálsson spurði sérfræðinginn sinn Teit Örlygsson út í þessa frammistöðu Kristófers sem var mjög duglegur að verja skot KR-inga í leiknum.

Sendi skilaboð

„Þessi varnarleikur hjá honum í seinni hálfleik og þá í fjórða leikhluta fannst mér senda skilaboð,“ sagði Teitur.

„Mér finnst þetta bara besti leikurinn sem ég hef séð hjá Kristó í nokkur ár. Mér fannst hann ‚dómínera' leikinn. Hann frákastaði, hann var að skora hinum megin. Hann er alltaf með háar prósentur í skotum sínum eins og vanalega,“ sagði Teitur.

„Öll þessi vinna hans einn á móti tveimur eða þremur. Það skipti engu máli og svo skilar hann öllu ofan í. Mér fannst Kristó vera algjörlega frábær í þessum leik,“ sagði Teitur.

Þetta er hans tími

„Núna er bara komið að ögurstundu og núna þurfa menn að vera bestir,“ sagði Stefán Árni.

„Þetta er bara hans tími. Nýbúinn að vera meiddur þarna í einhvern smá tíma og sjáið þessar tölur. Fjörutíu í framlag, 17 og 17,“ sagði Benedikt.

Edna og Nablinn sátt

„Ég sé fyrir mér Ednu mömmu hans [Edna María Jacobsen] vera mjög sátta í kvöld og svo vin okkar Andra Má [Eggertsson, Nablinn]. Þetta er þeirra kvöld,“ sagði Benedikt.

Hér fyrir neðan má horfa á þessa umræðu og einnig umræðu um liðsfélaga Kristófers Keyshawn Woods.