Kjartan og Marta til liðs við Mið­flokkinn

Þetta kemur fram í yfirlýsingu frá tvíeykinu. Vísir hefur ítrekað reynt að ná í Mörtu án árangurs. Í yfirlýsingu þeirra nefna þau að þetta eigi ekki síst við um samgöngumál. Hvorugt var á lista frambjóðenda Sjálfstæðisflokksins sem kynntur var á dögunum.

„Svokölluð borgarlína hefur verið eitt helsta áherslumál vinstri flokkanna á undanförnum árum undir forystu Samfylkingarinnar. Hins vegar hefur verið kvartað yfir því að stefna Sjálfstæðisflokksins í málinu sé í besta falli óljós.“

Borgarlínan þeim hugleikin

Segja þau að Borgarlínan yrði risavaxin opinber framkvæmd, sem hefði ýmsar neikvæðar afleiðingar í för með sér vegna mikils kostnaðar, skattahækkana og aukinna umferðartafa. Þau segja að hægt væri að stórefla núverandi strætisvagnakerfi með margfalt minna fé en fyrirhugað sé að setja í borgarlínuverkefnið. Slíkar umbætur á strætókerfinu segja þau að væri hægt að ráðast í strax í stað þess að bíða í að minnsta kosti hálfan áratug eftir rándýrri og ófjármagnaðri borgarlínu.

„Kostnaður vegna framkvæmdahluta borgarlínu mun sennilega nema hundruðum milljarða króna. Slík risaframkvæmd verður ekki fjármögnuð nema með auknum álögum á borgarbúa. Meðal annars á að fjármagna verkefnið með umferðargjaldi er koma á til viðbótar háum gjöldum, sem þegar eru innheimt af umferð. Slíkar viðbótarálögur munu líklega koma harðast niður á íbúum í eystri hverfum borgarinnar. Þeir stjórnmálamenn, sem styðja borgarlínu, eru því í raun að kalla eftir verulegum skatta- og gjaldahækkunum.“

Miðflokkurinn tekið skýra afstöðu

Þau segja í yfirlýsingu sinni að skptar skoðanir hafi verið um borgarlínu meðal borgarfulltrúa Sjálfstæðisflokksins á kjörtímabilinu. Meirihluti þeirra hafi verið andvígur verkefninu eða fjórir af sex.

„Sú andstaða er í samræmi við skoðun meirihluta sjálfstæðismanna í borginni. Miðflokkurinn hefur hins vegar tekið rétta og skýra afstöðu í afstöðunni til borgarlínu og í mörgum öðrum málum eins og margoft hefur komið fram í máflutningi kjörinna fulltrúa flokksins. Við teljum okkur því eiga samleið með Miðflokknum,“ segir tvíeykið.

„Við höfum bæði starfað lengi í Sjálfstæðisflokknum og eigum þar fjölmarga góða vini og kunningja. Við þökkum þeim fyrir samstarfið, sem oftast hefur verið gott, og óskum Sjálfstæðisflokknum velfarnaðar.“