Sjáðu Loga Geirs hengja Frakkann og tryggja sér titil

Fimm titilbardagar fóru fram á aðalhluta kvöldsins og einn af hápunktunum var svo sannarlega þegar Logi Geirsson tryggði sér beltið í millivigtarflokknum, með sigri á Frakkanum Theo Romary með hengingartaki.

Aðalbardagi kvöldsins var á milli Hákonar Arnórssonar og Írakans Ali Albazi. Þeir höfðu staðið í orðastappi fyrir bardagann en að lokum var það Albazi sem hafði betur á dómaraúrskurði, við litla kátínu áhorfenda sem létu vel í sér heyra.

Viktor Gunnarsson hafði hins vegar betur gegn Caleb Mullin, á einróma dómaraúrskurði. Viktor hafði verið yfirlýsingaglaður í aðdraganda bardagans og stóð við sitt með því að landa sigri.

Vitali Korshak, Úkraínumaður sem æfir hjá Reykjavík MMA, vann svo Thomas Murris á tæknilegu rothöggi í léttvigtarflokki.

Hekla Friðriksdóttir varð hins vegar að sætta sig við tap gegn Kathrin Haberle í bantamvigtarflokki, á dómaraúrskurði.

Þetta var í annað sinn sem að Glacier Fight Night fer fram en fyrsta kvöldið var í Andrews Theater við Ásbrú. Stefnt er að því að þriðja kvöldið verði í haust, þann 3. október, eftir sannarlega vel heppnað kvöld í gær með frábærum bardögum, fumlausri kynningu Arnars Dan Kristjánssonar, og ekki síðri tónlistaratriðum.