Leggja til að stakt veggjald yfir nýja Ölfus­ár­brú verði 495 krónur

Frá þessu greinir í stöðuskýrslu Vegagerðarinnar sem finna má á vef Alþingis.

Gjaldskráin byggir á reynslu frá Hvalfjarðargöngunum og Vaðlaheiðargöngunum. Gert er ráð fyrir magnafslætti fyrir minnstu bíla, þannig að stakt gjald yrði ódýrast 250 krónur. 

Umferð um eldri Ölfusárbrúa var að meðaltali 14.500 bílar á dag árið 2023 og án tillits til veggjalds er áætlað að um 60 prósent vegfarenda muni nýta gömlu brúna áfram og 40 prósent fara um nýju brúna. 

„Miðað við framsetningu á viðskiptaáætlun er áætlað að það hlutfall verði nokkuð lægra, eða um 36% af heildinni (og 64% fari þá um eldri brú). Við þá greiningu er m.a. horft tiL reynslu af innheimtu veggjalda í Hvalfjarðargöngum og Vaðlaheiðargöngum, og greiningu sem Rannsóknarmiðstöð Háskólans á Akureyri vann með Vegagerðinni um greiðsluvilja vegfarenda. Byggt á forsendum þeirrar greiningar er áætlaður greiðsluvilji vegfarenda um nýja Ölfusárbrú á bilinu 470-550 kr,“ segir í skýrslunni.

Umferðarspá um nýju brúna er um 7.225 bílar á dag á opnunarárinu 2028 og 10.025 bílar á dag árið 2040, án gjaldtöku. Með gjaldtöku er áætlaður fjöldi um 6.500 á opnunarárinu og um 9.000 árið 2040.