Þú færð ekki leik­skóla­pláss en svona á að halda barna­af­mæli

„Í hvert sinn sem við sækjumst eftir einhverju – stöðuhækkun, hjónabandi, nýjum bíl, ostborgara – væntum við þess að sú manneskja sem ber fingrafar okkar eftir sekúndu, mínútu, dag eða áratug verði okkur þakklát fyrir þær fórnir sem við færðum,“ segir Gilbert.

En viðbrögð þessa framtíðarfólks eru oft önnur en við ætluðum.

„Við þrælum okkur út til að veita þeim allt það sem við teljum þau þrá en svo segja þau upp vinnunni, safna hári, flytja til eða frá San Francisco og spyrja hvernig við gátum verið svona vitlaus að halda að þetta væri það sem þau vildu.“

Meint skuggaleg fortíð frambjóðanda

Nýverið tilkynnti Pétur Marteinsson, rekstrarstjóri og fyrrverandi knattspyrnumaður, um að hann hygðist gefa kost á sér gegn sitjandi borgarstjóra í oddvitasæti Samfylkingarinnar í Reykjavík fyrir næstu borgarstjórnarkosningar.

Andstæðingar Péturs voru ekki lengi að grafa upp meint hneyksli úr fortíð hans: Pétur hafði skipað níunda sæti á lista Sjálfstæðisflokksins í Reykjavík norður í alþingiskosningum árið 2009.

Rannsóknir benda til þess að persónuleiki okkar, gildi og smekkur taki stöðugum breytingum; að ekkert okkar sé sama manneskja í dag og við vorum í gær, í síðustu viku eða á síðasta áratug.

Sú krafa virðist hins vegar gerð til frambjóðenda til borgarstjóra að þeir hafi ekki tekið breytingum síðustu sautján ár.

En í stað þess að fordæma þá sem eru aðrir menn í dag en þeir voru árið 2009 mættu fleiri íhuga að tileinka sér sveigjanleika Péturs.

Foreldrar sættu gæsluvarðhaldi

Undirrituð er ekki sama manneskjan í dag og hún var í gær. Í morgun vaknaði ég eftir hamskipti. Ég hafði þó ekki breyst í bjöllu eins og sölumaðurinn Gregor Samsa í bók Kafka heldur lítinn Heimdelling.

Ástæða umbreytingarinnar var frétt sem ég las áður en ég fór að sofa.

Í lok síðasta árs vöktu leiðbeiningar Reykjavíkurborgar um hvernig standa ætti að barnaafmælum kurr. Mæltist borgin til þess að ekki væri boðið í afmælisveislur grunnskólabarna eftir kyni, því slíkt væri „útilokandi“ og ynni „gegn markmiðum jafnréttislaga“, heldur væri annað hvort öllum bekknum boðið eða bekknum skipt upp í minni „afmælishópa“.

Leiðbeiningarnar voru hafðar að háði og spotti og lagði borgarfulltrúi Framsóknarflokksins fram tillögu um að þær yrðu endurskoðaðar.

En unnendur einþykkni þurfa ekki að örvænta. Borgin er sú sama í dag og hún var í gær: „Afmælistilmæli borgarinnar standa óhögguð,“ kvað í fyrirsögn mbl.is í kjölfar þess að tillögunni var vísað frá.

Nú er ég ekki með diplóma í opinberri stjórnsýslu. En sem móðir þriggja barna er ég með doktorspróf úr skóla lífsins í hagnýtri viðburðastjórnun á grunnskólastigi og ætla að leyfa mér að fullyrða að:

a) Flestir foreldrar sættu glaðir gæsluvarðhaldi fyrir grun um að brjóta jafnréttislög til að komast hjá því að skemmta heilum bekk af skólafélögum barna sinna.

b) Þeir sem telja að það muni leiða til friðsamlegrar niðurstöðu að skipta börnum niður í afmælishópa: 1) eiga ekki börn 2) hafa ekki lesið Lord of the Flies.

Á þeim tuttugu árum sem ég hef skrifað pistla um samfélagsmál hef ég aldrei notað f-orðið. En nú get ég ekki setið á mér: Hvílík forræðishyggja!

Að stjórnsýslustofnun, sem hefur ekki bolmagn til að bjóða ásættanlega leikskólaþjónustu, skuli telja sig í aðstöðu til að segja foreldrum hvernig þeir eigi að halda barnaafmæli, kallar fram í manni frumstæða löngun til að hrópa eitthvað um „báknið“. Kannski að næsti pistill fjalli um það hvort ekki eigi að selja áfengi í matvöruverslunum.

Vegurinn til helvítis

Samkvæmt nýjustu könnun Maskínu er meirihlutinn í borginni fallinn. Fylgi Sjálfstæðisflokksins eykst hins vegar og mælist þrjátíu og eitt prósent.

Framganga borgarstjórnarmeirihlutans nú um stundir breytir því fleirum en undirritaðri í litla Heimdellinga.

Vegurinn til helvítis er markaður góðum ásetningi. Sjálfsagt er að fyrirgefa borgarstjórn vanhugsaðar en vel meinandi veisluráðleggingar, sem virðast hafa fundist í akademísku skúmaskoti í einhverjum tilgátufræðum. Það er hins vegar ófyrirgefanlegt að stjórnendur borgarinnar sjái ekki að sér þegar fánýti og fáránleiki þeirra blasir við og skili plagginu þangað sem það á heima: Í ritgerð nemanda á félagsvísindasviði Háskólans.

Rannsóknir sýna að við breytumst öll, sama hvort við ætlum okkur það eða ekki. Ef marka má skoðanakannanir mun borgarstjórn senn taka breytingum sama hvað núverandi valdhafar spyrna við fótum.