Grét og gat ekki kastað pílum fyrir að­eins fjórum árum

Hollendingurinn hefur átt frábært ár, hann varð Evrópumeistari og heimsmeistari ungmenna og komst svo í úrslitaleik HM í gærkvöldi eftir sigur gegn fyrrum tvöfalda heimsmeistaranum Gary Anderson.

Þar mun hann mæta yngsta heimsmeistara sögunnar, Luke Littler, og van Veen gæti orðið sá næstyngsti.

Hinn 22 ára gamli van Veen hefur áður sagt frá því að hann sé litblindur og eigi erfitt með að greina reitina á spjaldinu.

Eftir undanúrslitaleikinn í gær sagði hann svo frá því á hjartnæman hátt að fyrir aðeins fjórum árum síðan hefði hann glímt við „Dartitis“ sem er andlegur sjúkdómur en hefur áhrif á líkamann og gerir mönnum ókleift að kasta pílum.

„Dartitis“ hefur verið líkt við þekkt hugtak úr golfheiminum: „The Yips.“

Bæði pílukastarar og kylfingar í fremstu röð á heimsvísu hafa neyðst til að hætta þegar þeir lenda í þessu en van Veen yfirsteig erfiðleikana.

„Fyrir bara þremur eða fjórum árum var ég í miklum vandræðum og ég man eftir því að hafa setið grátandi við kvöldmatarborðið, en þetta hefur allt verið þess virði“ sagði van Veen.

„Ég vil þakka öllum þeim sem hafa hjálpað mér að komast hingað. Foreldrar mínir hafa fylgt mér á öll mót síðan ég var svona tólf ára og núna erum við komin hingað, þetta er ótrúlegt.“

„Ég glímdi við Dartitis í mörg ár og ástandið var mjög slæmt fyrir fjórum árum þegar ég var að stíga skrefið yfir í atvinnumennsku. En meira að segja á góðu tímunum hélt að úrslitaleikur HM myndi aldrei gerast fyrir mig. Þetta er draumur að rætast.“