Átta bestu mætast eftir magnað kvöld á Bullseye

Sindri Sverrisson skrifar 16. nóvember 2025 10:05

Árni Ágúst fagnaði ákaft eftir sigurinn í úrslitaleiknum í gær og salurinn tók undir. Sýn Sport

Óhætt er að segja að mögnuð tilþrif hafi sést á fjórða og síðasta stigasöfnunarkvöldi Úrvalsdeildarinnar í pílukasti, á Bullseye í gær. Sjö af átta keppendum voru með bakið uppi við vegg svo hver píla og hver leggur skipti máli.

Á endanum var það Árni Ágúst Daníelsson sem stóð uppi sem sigurvegari í gærkvöld, eftir frábæran úrslitaleik gegn Herði Þór Guðjónssyni. Árni Ágúst endaði því stigahæstur í deildarkeppninni, þar sem hver pílukastari tók þátt í tveimur af fjórum mótum, en hér má sjá tilþrif þeirra Harðar í úrslitaleiknum.

Klippa: Árni Ágúst bestur á spennukvöldi á Bullseye

Tveir til viðbótar trygggðu sig í gær inn í átta manna úrslitin sem nú liggja fyrir og hefjast næsta laugardagskvöld.

Þessir átta urðu efstir og spila í átta manna úrslitum Úrvalsdeildarinnar í pílukasti. Halli Birgis endaði aðeins einum legg fyrir ofan Davíð Svansson.Sýn Sport

Í fyrsta leik gærkvöldsins mættust slökkviliðsmaðurinn frá Reykjanesbæ, Arngrímur Anton Ólafsson, og handboltamarkvörðurinn Davíð Svansson og gerði sá síðarnefndi sér lítið fyrir og sópaði Tona út, 3-0, eftir flotta frammistöðu. Davíð endaði leikinn með 64,41 í meðaltal en það gekk mun betur hjá Davíð að loka leggjum, sérstaklega í legg númer 2 þegar hann kom aftan að Tona og skellti í 180 og skildi sig eftir í 92 og tók það svo út á meðan Tona tókst ekki að loka 32.

Næsti leikur hefði átt að vera á milli Árna Ágústs og Halla Egils en Halli þurfti að draga sig úr keppni af persónulegum ástæðum. Hann var samt sem áður búinn að tryggja sig í átta manna úrslitin en Árni Ágúst fékk frípassa í undanúrslitin.

Davíð einum legg frá átta manna úrslitum

Hörður Þór og hinn ungi og efnilegi Kári Vagn Birkisson mættust í þriðja leik kvöldsins en þar mátti ungstirnið þola 3-0 tap og Hörður þar með kominn í ansi góða stöðu varðandi það að komast áfram í átta manna úrslit deildarinnar.

Síðasti leikurinn í átta manna úrslitum í gær var svo á milli Halla Birgis og Skagamannsins Gunna Hó. Báðir með gamla góða bakið upp við vegg en sá leikur fór alla leið í oddalegg. Þar var Halli Birgis öruggur og lokaði þeim legg en var á sama tíma ekki búinn að tryggja sitt sæti í átta manna þar sem hann og Davíð Svans voru að keppa um það sæti.

Í undanúrslitum var fyrri leikurinn á milli Harðar og Davíðs en báðir þurftu að vinna leikinn til að tryggja sig áfram. Hörður hélt uppteknum hætti og var öruggur og lokaði þeim leik 3-1 og tryggði sér um leið sæti á átta manna úrslitakvöldinu.

Frábær úrslitaleikur

Seinni leikurinn var svo á milli Halla Birgis og Árna Ágústs en á þeim tíma dugði Halla Birgis að vinna tvo leggi til að tryggja sig í átta manna úrslit og senda Davíð í fríið. Eftir að hafa lent 1-0 undir þá gerði Halli sér lítið fyrir og kom sér í 2-1 og tryggði sitt sæti í átta manna úrslitunum. Árni Ágúst vann hins vegar næstu tvo leggi og þar með leikinn, og mætti Herði í úrslitaleiknum.

Í úrslitum fékk fólk svo sannarlega að sjá pílukast eins og það gerist best. Árni Ágúst byrjaði á að stela legg eitt eftir að Hörður var langt á undan í útskot. Í legg tvö sýndi Hörður svo sannarlega að hann er Guðjónsson (Guðjón pabbi hans er á háum stalli í sögu íslensks pílukasts). Eftir fyrstu tvær heimsóknir var Hörður með 403 eftir, í næstu tveimur heimsóknum skoraði hann 140 og 140 og skildi sig eftir í 123, og tók það svo út og náði á sama tíma hæsta útskoti kvöldsins.

Eftir þann legg sýndi Árni af hverju hann er samt sem áður einn af okkar bestu kösturum og kláraði næstu tvo leggi og tryggði sér í kjölfarið efsta sætið í stigasöfnun.