Trump setur tolla á lyf, vöru­bíla og hús­gögn

Fjölmörg alþjóðleg lyfjafyrirtæki eru að framleiða verksmiðjur í Bandaríkjunum eða hafa tilkynnt að það standi til, samkvæmt frétt Wall Street Journal. Mörg önnur hafa ekki verksmiðjur í Bandaríkjunum en Trump setti fyrr á árinu fimmtán prósenta toll á flest sem framleidd eru í Evrópusambandinu.

WSJ segir að um níu af hverjum tíu lyfseðlum sem gefnir séu út í Bandaríkjunum séu um almenn lyf sem tollar munu ekki hafa áhrif á.

Í frétt DR segir hins vegar að tilkynning Trumps veki mikilvægar spurningar fyrir fyrirtæki eins og Novo, sem framleiðir þyngdarlosunarlyfið Ozempic. Hvort nóg sé að framleiða eitthvað í Bandaríkjunum fyrir fyrirtæki til að losna alfarið við tolla eða hvort tollar verði settir á öll lyf sem eru ekki framleidd í Bandaríkjunum, þó fyrirtæki framleiði einhver lyf þar í landi.

Trump tilkynnti einnig í gær að hann ætli að setja 25 prósenta toll á stóra vörubíla og fimmtíu prósenta toll á baðhúsgögn en þrjátíu prósenta toll á bólstruð húsgögn og eiga þeir einnig að taka gildi um mánaðamótin.

Hæstiréttur skoðar tollana

Stór hluti þeirra tolla sem Trump hefur beitt gegn fjölmörgum ríkjum heims var úrskurðaður ólöglegur fyrr á árinu. Dómarinn ákvað þrátt fyrir það að leyfa tollunum að gilda á meðan málið færi fyrir hæstarétt Bandaríkjanna.

Dómarar hæstaréttar samþykktu kröfu bæði ríkisstjórnarinnar og fólksins sem höfðaði málið upprunalega um að taka málið í flýtimeðferð en það mun samt ekki gerast fyrr en í nóvember. Úrskurður gæti legið fyrir í lok árs.

Sá úrskurður mun þó eingöngu hafa áhrif á flötu tollana sem Trump hefur beitt á grunni laga um neyðarástand frá 1977. Þessum lögum hafði þangað til að mestu verið beitt til að koma á refsiaðgerðum vegna ógna gegn Bandaríkjunum.

Í fyrri úrskurðum í málinu sögðu dómarar að umrædd lög veiti forseta Bandaríkjanna umfangsmiklar heimildir en það að beita tollum eða sköttum sé ekki þar á meðal. Það ætti samkvæmt stjórnarskrá Bandaríkjanna að vera á höndum þingsins.

Ríkisstjórn Trumps segir að verði tollarnir úrskurðaðir ólöglegir muni það leiða til hamfara í Bandaríkjunum. Búist sé við því að ríkið muni afla allt að þúsund milljörðum dala vegna tollanna fyrir næsta sumar og falli það niður myndu afleiðingarnar á ríkisreksturinn verða miklar.

Einnig þyrfti að semja við fjölda ríkja upp á nýtt og jafnvel endurgreiða ríkjum sem búið er að semja við á grunni tollanna.