Heiður Anna nýr fram­kvæmda­stjóri FS

Í tilkynningu segir að Heiður taki við af Guðrúnu Björnsdóttur, sem hefur ákveðið að láta af störfum eftir 26 ár í starfi.

„Heiður Anna hefur starfað hjá Félagsstofnun stúdenta í rúm átta ár, síðast sem þjónustustjóri Stúdentagarða. Hún situr einnig í stjórn NSBO, samstarfs norrænna stúdentagarða. Heiður hefur víðtæka reynslu á sviði þjónustuþróunar og býr yfir yfirgripsmikilli þekkingu á starfsemi FS, málefnum stúdenta og háskólasamfélaginu. Heiður er að ljúka MBA námi með áherslu á stefnumótun og sjálfbærni við Porto Business School,“ segir í tilkynningunni. 

Ótrúlega þakklát

Haft er eftir Heiði Önnu að hún sé ótrúlega þakklát fyrir traustið sem stjórn FS hafi sýnt sér og kveðst hún spennt fyrir komandi árum. 

„Ég hef lifað og hrærst í háskólasamfélaginu síðastliðin 14 ár; sem starfsmaður FS, íbúi Stúdentagarða, nemandi og fulltrúi í hagsmunabaráttu stúdenta. Hjarta mitt slær í takt við stefnu og gildi FS. Ég hef trú á því að með áframhaldandi öflugri forystu geti Félagsstofnun stúdenta haldið áfram að vaxa og dafna. Þá finnst mér brýnt að tilgangur FS, að auka lífsgæði stúdenta, sé ávallt hafður að leiðarljósi og sé lifandi í hugum stúdenta og starfsfólks. Ég hlakka þess vegna mikið til að leggja mitt af mörkum til að leiða Félagsstofnun stúdenta inn í næsta kafla með skýra stefnu, stöðugleika og mannlega nálgun að leiðarljósi.“

Forréttindi

Þá er haft eftir Guðrún Björnsdóttur, fráfarandi framkvæmdastjóra FS, að þetta hafi verið mikil forréttindi að leiða uppbyggingu FS undanfarin 26 ár. „Vöxtur félagsins hefur verið mikill yfir tímabilið og þakka ég það öllu því frábæra starfsfólki sem FS hefur á að skipa og öllum þeim góðu samstarfsaðilum sem hafa unnið með okkur í þágu stúdenta. Listi samstarfsaðila er langur en ég vil þakka Háskóla Íslands, Reykjavíkurborg, Landsbanka Íslands, Arionbanka, HMS, öllum hönnuðum og verktökum ásamt þeim fjölmörgu birgjum sem hafa unnið með okkur í gegnum árin.

Gildi FS eru góð og það hefur verið gefandi að koma að uppbyggingu háskólasamfélagsins alls. Ég geng stolt frá borði og afhendi Heiði Önnu keflið og óska henni velfarnaðar í starfi. Starfsfólki FS þakka ég kærlega fyrir samstarfið og óska félaginu velfarnaðar um ókomin ár,“ segir Guðrún. 

Guðrún drifkraftur að fjölbreyttri uppbyggingu

Sömuleiðis er haft eftir Kristófer Má Maronssyni, stjórnarformanni FS, að hann vilji fyrir hönd stjórnar þakka Guðrúnu Björnsdóttur fyrir að hafa helgað stórum hluta starfsferils síns í þjónustu við stúdenta. 

„Undir hennar forystu hefur FS tekið miklum breytingum, vaxið og orðið órjúfanlegur hluti af háskólasamfélaginu. Hún hefur verið drifkraftur að fjölbreyttri uppbyggingu og skapað þann trausta grunn sem starfsemi FS stendur á í dag.

Heiður Anna hefur víðtæka þekkingu á starfseminni, mikla ástríðu fyrir háskólasamfélaginu og því verkefni sem FS sinnir innan þess. Hún kemur með ferskar hugmyndir og skýra sýn á hvernig hægt er að bæta þjónustuna enn frekar. Stjórn FS hlakkar til samstarfsins í þeim krefjandi en spennandi verkefnum sem fram undan eru. Við trúum því að undir hennar forystu muni FS halda áfram að þróast og dafna, auka lífsgæði stúdenta og treysta stöðu sína sem einn af burðarásum háskólasamfélagsins,“ segir Kristófer Már.

Um Félagsstofnun stúdenta segir að hún sé óhagnaðardrifin sjálfseignarstofnun með sjálfstæða fjárhagsábyrgð. FS var stofnuð árið 1968 og tók formlega til starfa 1. júní sama ár. Aðild að stofnuninni eiga allir skrásettir stúdentar við Háskóla Íslands, Háskólinn og menningar- nýsköpunar- og háskólaráðuneyti. Gildi FS eru virk samvinna, góð þjónusta, jákvæð upplifun og markviss árangur.