„Langar helst að setjast hér niður og gráta“

Ísland hefur aldrei unnið leik á EM í körfubolta en tækifærið var svo sannarlega til staðar í dag og það veit Martin manna best:

„Þetta er gífurlega mikið svekkelsi. Mér fannst við gera allt rétt stærstan hluta leiksins en svo í lokin… ég veit ekki hvort ég get skrifað þetta á þreytu, hæð, leikform, eða hvað. Það er svo erfitt á þessum tímapunkti að hitt liðið sé að fá sóknarfráköst og annan séns. Á sama tíma fengum við fullt af sénsum til að klára þennan leik.

Menn voru að fá skot sem þeir hafa sett niður milljón sinnum. Það er bara svo stutt á milli í þessu. Með aðeins meiri heppni eða aðeins meiri hittni [hefði Ísland unnið]. Við hittum þremur þristum í öllum leiknum, sem er dýrt fyrir þjóð eins og okkur sem þarf að treysta á þriggja stiga skotin og þessa stemningsþrista sem koma okkur yfir línuna,“ sagði Martin en viðtalið má sjá hér að neðan.

Íslenska liðið hefur fengið magnaðan stuðning á mótinu og fyrir það er Martin afar þakklátur:

„Þetta er ómetanlegt. Ég er búinn að vera með gæsahúð í þrjá daga. Þetta er magnað. Sérstaklega fyrir okkur sem erum ekkert vanir því að vera á lokamóti. Ég vona að það komist til skila til fólksins uppi í stúku hvað þetta skiptir okkur miklu máli. Við tökum þessu alls ekki sem sjálfsögðum hlut og erum að reyna að kreista út þennan helv… fyrsta sigur.

Þetta er bara ein þjóðhátíð hérna í Katowice og við erum alveg að reyna að njóta en svo er maður keppnismaður og þetta er fúlt. Mig langar helst að setjast hér niður og gráta. Þetta er ótrúlega svekkjandi en það er líka jákvætt að við séum komnir á þann stað að fara fram á sigur á stórmóti. Það var aldrei inni í myndinni fyrir tíu árum,“ sagði Martin en viðtalið má sjá hér að ofan.