Veiðigjaldafrumvarpið sam­þykkt

Frumvarpið var samþykkt með 34 atkvæðum gegn 23. Sex voru fjarverandi, þar á meðal Guðmundur Ingi Kristinsson, mennta- og barnamálaráðherra. 

Íslandsmet í málþófi var slegið í annarri umræðu málsins, sem var rætt í meira en 160 klukkustundir. Frumvarpið var eitt það umdeildasta í sögu Alþingis. Á föstudaginn var 71. grein þingskapalaga, sem vísað hefur verið til sem „kjarnorkuákvæðisins“ beitt með þeim afleiðingum að málið var sett í þriðju umræðu. Ákvörðunin þótti, líkt og málið allt, umdeild. 

Frumvarpið var lagt fram þann 30. apríl. Fyrstu umræðu lauk með atkvæðagreiðslu þann 12. maí og fór þar með til atvinnuveganefndar. Þaðan var það afgreitt þann 14. júní. Þá hófst hin sögulega önnur umræða en frumvarpið var á dagskrá 21 þingfundar í annarri umræðu. 

71. grein þingskapalaga var sem fyrr segir beitt síðastliðinn föstudag en hún kveður á um heimild forseta til að leggja til að umræðum verði hætt.

Þriðju og síðustu umræðu lauk í dag. Á þingfundi í dag sökuðu formenn stjórnarandstöðuflokkanna ríkisstjórnina um þöggunartilburði og spáðu því að málið verði henni að lokum að falli. 

Tvær breytingatillögur á frumvarpinu voru lagðar fram að þriðju umræðu lokinni. Önnur var felld en hin samþykkt að hluta til. 

Ráðherrar föðmuðust að máli loknu

Í skýringu á atkvæði sínu og jafnframt síðustu ræðu sem flutt var í málinu öllu sagði Hanna Katrín Friðriksson atvinnuvegaráðherra að umræðan um sjávarútveg á Íslandi hafi undanfarna áratugi hverfst um hve lítinn hlut þjóðin hafi borið af nýtingarrétti auðlinda.

„Um það óréttlæti hefur verið staðinn vörður af fyrrverandi stjórnum. Umræðan hefur harðnað undanfarin ár eftir því sem sífellt hefur komið betur í ljós sú gríðarlega auðsöfnun örfárra aðila í ljósi og krafti þessa sama nýtingarréttar. Og nú er verið að leiðrétta það mikla prinsippmál.“

Hún segir fátt fjarri sannleikanum en málflutningur stjórnarandstöðunnar sem telji sig tala máli landsbyggðarinnar. 

„Það er nákvæmlega á landsbyggðinni sem þetta gríðarlega óréttlæti hefur komið í ljós. Samþætting brottfararskipa, tilfærsla kvóta, auðsöfnun og það að þetta hefur ekki skilað sér til þjóðarinnar með tilheyrandi uppbyggingu innviðaskuldar. Því breytum við nú, þetta er góður dagur. Ég segi já,“ sagði Hanna Katrín að lokum. 

Þar á eftir gerði Þórunn Sveinbjarnardóttir forseti Alþingis hlé á þingfundi og Hanna Katrín og Þorgerður Katrín Gunnarsdóttir utanríkisráðherra sjást fallast í faðma. 

Á vef Alþingis kemur fram hverjir greiddu atkvæði með og gegn frumvarpinu. Þeir þingmenn sem greiddu atkvæði með því eru eftirfarandi: 

Arna Lára Jónsdóttir, Ása Berglind Hjálmarsdóttir, Ásthildur Lóa Þórsdóttir, Dagbjört Hákonardóttir, Dagur B. Eggertsson, Eiríkur Björn Björgvinsson, Eydís Ásbjörnsdóttir, Eyjólfur Ármannsson, Grímur Grímsson, Guðbrandur Einarsson, Guðmundur Ari Sigurjónsson, Hanna Katrín Friðriksson, Hildur Rós Guðbjargardóttir, Inga Sæland, Heiða Ingimarsdóttir, Jóhann Páll Jóhannsson, Jón Gnarr, Jónína Björk Óskarsdóttir, Kolbrún Áslaugar Baldursdóttir, Kristján Þórður Snæbjarnarson , Kristrún Frostadóttir, Lilja Rafney Magnúsdóttir, Logi Einarsson, María Rut Kristinsdóttir, Pawel Bartoszek, Ragnar Þór Ingólfsson, Sigmar Guðmundsson, Sigmundur Ernir Rúnarsson, Sigurður Helgi Pálmason, Sigurjón Þórðarson, Sigurþóra Steinunn Bergsdóttir, Víðir Reynisson, Þorgerður Katrín Gunnarsdóttir og Þórunn Sveinbjarnardóttir.

Ráðherra fjarverandi

Þá greiddu eftirfarandi þingmenn gegn frumvarpinu: 

Árni Helgason, Bergþór Ólason, Birna Bragadóttir, Bryndís Haraldsdóttir, Diljá Mist Einarsdóttir, Guðlaugur Þór Þórðarson, Guðrún Hafsteinsdóttir, Hildur Sverrisdóttir, Ingibjörg Davíðsdóttir, Jóhann Friðrik Friðriksson, Jón Pétur Zimsen, Karl Gauti Hjaltason, Nanna Margrét Gunnlaugsdóttir, Njáll Trausti Friðbertsson, Ólafur Adolfsson, Rósa Guðbjartsdóttir, Sigmundur Davíð Gunnlaugsson, Sigríður Á. Andersen, Sigurður Ingi Jóhannsson, Stefán Vagn Stefánsson, Vilhjálmur Árnason, Þorgrímur Sigmundsson og Þorsteinn B Sæmundsson.

Guðmundur Ingi Kristinsson barna- og menntamálaráðherra, Jens Garðar Helgason, Jónína Brynjólfsdóttir, Þorbjörg Sigríður Gunnlaugsdóttir, Þórarinn Ingi Pétursson og Þórdís Kolbrún Reykfjörð Gylfadóttir voru fjarverandi. 

Fréttin hefur verið uppfærð.