Átta látnir hið minnsta eftir að kviknaði í loft­belg

Myndbönd hafa dreifst á samfélagsmiðlum sem sýna loftbelginn hrapa til jarðar í ljósum logum. Af þeim tuttugu sem voru um borð í loftbelgnum þegar hann hrapaði er talið að þrettán hafi lifað af. Þeir voru fluttir á sjúkrahús í Santa Catarina-fylki þar sem slysið átti sér stað.

Vinsælt er fyrir ferðamenn á svæðinu sem er í nágrenni borgarinnar Florianópolis að fljúga um falleg gljúfrin í loftbelg. Svæðið er gjarnan kallað Kappadókía Brasilíu eftir héraðinu í Tyrklandi þar sem loftbelgsferðir eru einnig vinsælar meðal ferðamanna.

Héraðsmiðillinn Jornal Razão fjallar um málið. Í umfjöllun hans kemur fram að slysið hafi átt sér stað á áttunda tímanum í morgun á staðartíma þegar um þrjátíu loftbelgir tóku á loft til að fljúga yfir gljúfur Serra Geral-fjallgarðsins.

„Þegar kviknaði í loftbelgnum kastaði fólk sér fyrir borð. Þeir reyndu að flýja eldinn,“ hefur miðillinn eftir vitni.

Samkvæmt umfjöllun miðilsins lifði flugmaðurinn slysið af og sagði að eldurinn hefði kviknað út frá varahitara sem var um borð í körfunni.

„Þegar hann varð eldsins var reyndi hann að lækka flugið eins hratt og auðið var. Þegar loftfarið var nálægt jörðinni skipaði hann farþegunum að stökkva fyrir borð. Sumir stukku og lifðu af en særðust. Aðrir hins vegar komust ekki fyrir borð í tæka tíð,“ segir í umfjöllun Jornal Razão.