Tékk­neski og banda­ríski herinn á­samt flugsystrum á Akur­eyri

Sýningarsvæðið við Flugsafnið verður opið milli klukkan 13 og 16. Dagskrá hefst klukkan 13:20 með því að Flugmódelfélag Akureyrar færir Flugsafninu nýtt módel af Grumman Goose flugbát að gjöf. Eyjólfur Ármannsson innviðaráðherra setur svo flugdaginn klukkan 13:40. Spáð er allt að 18 stiga hita á Akureyri í dag, fremur hægum vindi og bjartviðri með köflum.

Flugsýningin hefst klukkan 14. Þar má nefna listflug reykspúandi flugsveitar, þrjár kynslóðir sjúkravéla, gyrosveitina, Landhelgisgæslu Íslands og einu sjóflugvélina á landinu. DC-3, Landgræðsluvélin Páll Sveinsson, verður opin gestum en athygli flugáhugamanna vakti á dögunum að hreyflar hennar voru ræstir á ný eftir langt hlé.

Að auki gefst gestum meðal annars kostur á að skoða Twin Otter-vélar Norlandair og Beechcraft B200 King Air sjúkraflugvél Norlandair. Slökkvilið Akureyrar verður á staðnum með búnað til sjúkraflutninga til sýnis, Flugskóli Akureyrar verður með kynningu á flugnámi og Flugmódelfélag Akureyrar sýnir flugmódel.

Flugsystur kynna sig til leiks en það eru ný samtök sem stofnuð voru af flugmönnunum Auði Birnu Snorradóttur og Helgu Sigurveigu Kristjánsdóttur. Á heimasíðu Flugsystra segir að hugmyndin hafi sprottið upp úr löngun til að efla tengsl kvenna í flugi, hvort sem um sé að ræða atvinnuflugmenn, flugnemendur eða konur sem starfi með einum eða öðrum hætti í kringum flug. Markmið Flugsystra sé að hlúa að vináttu og deila reynslu, svo konur finni öflugan stuðning til að láta flugdrauma sína rætast.

Loks vekur athygli að bæði bandaríski sjóherinn með P-8 kafbátaleitarvél og tékkneski flugherinn með Gripen-orustuþotu boða komu sína en flugsveit tékkneska flughersins hefur undanfarnar vikur annast loftrýmisgæslu við Ísland frá Keflavíkurflugvelli.