Segir klerka­stjórninni að semja áður en það „verður of seint“

Donald Trump, forseti Bandaríkjanna, segir að klerkastjórnin verði að gera samkomulag um kjarnorkurannsóknir þeirra, áður en það verði of seint. Árásirnar á landið muni eingöngu verða umfangsmeiri.

Árásir Ísraela í dag hafa meðal annars beinst að hátt settum mönnum í herafla Íran, eins og árásirnar í nótt gerðu einnig. Margir af æðstu leiðtogum hers landsins og byltingarvarðarins, auk kjarnorkuvísindamanna, eru sagðir liggja í valnum en klerkastjórnin hefur lítið staðfest í þessum efnum.

Ísraelar segjast í morgun hafa fellt marga af æðstu leiðtogum flughers Íran þegar þeir komu saman á fundi í neðanjarðarbyrgi. Amir Ali Hajizadeh, æðsti yfirmaður fluhersins, er sagður hafa verið í byrginu.

Einn talsmanna hersins segir árásirnar eingöngu vera að hefjast og að enn sé búist við miklum viðbrögðum frá Íran.

Árásir á kjarnorkuvopnaáætlun Íran

Ísraelar hafa lengi sakað Írana um að vilja koma upp kjarnorkuvopnum og segja að slíkt myndi ógna tilvist Ísraelsríkis. Viðræður milli klerkastjórnarinnar og ríkisstjórnar Donalds Trump, forseta Bandaríkjanna, hafa ekki skilað árangri og virðast hafa strandað á dögunum.

Stjórn Alþjóðakjarnorkumálastofnunarinnar (IAEA) ályktaði í gærmorgun að ráðamenn í Íran stæðu ekki við skuldbindingar sínar varðandi samningin gegn útbreiðslu kjarnorkuvopna. Í kjölfarið sökuðu Ísraelar Írana um að safna mjög auðguðu úrani, með því markmiði að smíða kjarnorkusprengjur.

Sjá einnig: Íranir séu vikum eða mánuðum frá kjarn­orku­sprengju

Þó nokkrar árásir virðast hafa verið gerðar á kjarnorkurannsóknarstöðina í Natanz, en hún er sú stærsta sinnar tegundar í Íran. Ísralear birtu í morgun myndband sem á að vera af þeirri rannsóknarstöð.

Ayjatollah Ali Khameini, æðstiklerkur Íran, hefur heitið hefndum gegn Ísrael og sagt að Ísraelar muni gjalda fyrir árásirnar. Shahed-sjálfsprengidrónum hefur verið flogið frá Íran í átt að Ísrael en þeir virðast hafa verið skotnir niður.

Sjá einnig: Æðstiklerkurinn hótar hefndum og drónaárásir eru hafnar

Forsvarsmenn Mossad, leyniþjónustu Ísrael, birtu í morgun myndbönd sem sýna útsendara stofnunarinnar í Íran. Þar notuðu þeir smáa sjálfsprengidróna til að granda loftvarnarkerfum áður en árásirnar hófust í gær. Drónarnir voru einnig notaðir gegn skotflaugum sem Íran hefði getað skotið að Ísrael.

Þessar aðgerðir eru sagðar hafa grafið undan vörnum Íran fyrir árásirnar í gærkvöldi.

„Þeir eru allir fallnir núna“

Donald Trump sagði á dögunum að hann vildi ekki að Ísraelar gerðu árásir á Íran og vildi frekar láta reyna frekar á samningaviðræður til að koma böndum á kjarnorkvuopnaáætlun klerkastjórnarinnar. Tóninn í Trump breyttist töluvert á allra síðustu dögum og gaf hann til kynna að hann hefði ekki mikla trú á því að viðræður myndu bera árangur.

Hann skrifaði svo í morgun á Truth Social, samfélagsmiðil sinn, að hann hefði itrekað gefið Írönum tækifæri til að semja en það hafi ekki borið árangur.

„Ég sagði þeim að þetta gæti orðið mun verra en þeir hafa áður þekkt, búist við eða verið sagt, að Bandaríkin framleiði bestu og bannvænustu hergögn heimsins og að Ísraelar ættu mikið af þeim. Og þeir kunna svo sannarlega að nota þau,“ skrifaði Trump.

Hann sagði ákveðna harðlínumenn hafa talað af hugrekki en þeir hafi ekki áttað sig á því sem væri í vændum.

„Þeir eru allir fallnir núna og þetta mun eingöngu versna,“ skrifaði Trump. Hann sagði að enn væri þó hægt að binda enda á „þessa slátrun“. Íranar yrðu að semja.

„GERIÐ ÞAÐ, ÁÐUR EN ÞAÐ VERÐUR OF SEINT.“