Borgin verði í­trekað af við­burðum vegna gjald­töku

Í morgun var greint frá því að Landssamband hestamannafélaga hefði ákveðið að láta ekki bjóða sér rukkun borgarinnar upp á 477,5 þúsund krónur í aðstöðugjald vegna Miðbæjarreiðarinnar svokölluðu. Að óbreyttu verði ekkert af reiðinni.

„Við sjáum mörg dæmi þess að viðburðir séu færðir til annarra sveitarfélaga eða rótgrónum viðburðum aflýst vegna gjaldtöku borgarinnar. Nýjasta dæmið er auðvitað miðbæjarreið Landsambands hestamanna sem nú hefur verið aflýst af þessum sökum. Þetta er verulega óæskileg þróun,“ segir Hildur Björnsdóttir, oddviti Sjálfstæðismanna í borginni, í samtali við Vísi.

Tillögunni vísað til umhverfis- og skipulagssviðs

Hildur lagði í dag fram svohljóðandi tillögu á fundi borgarráðs:

„Borgarráð samþykkir að gera eftirfarandi breytingar á gjaldskrá Reykjavíkurborgar vegna afnotaleyfa, þar sem gjald vegna afnotaleyfa fyrir minniháttar aðstöðusköpun og verulega aðstöðusköpun verður fellt niður. Gjald vegna meiriháttar aðstöðusköpunar verði helmingað. Breytt gjaldskrá taki gildi eigi síðar en 1. júní 2025. Mikilvægt er að höfuðborgin leggi ekki stein í götu þeirra sem hafa hug á því að sinna viðburðahaldi í borginni en dæmi eru um að viðburðir, bæði nýir og rótgrónir, hafi verið felldir niður eða færðir til annarra sveitarfélaga vegna óhóflegrar gjaldtöku borgarinnar.“

Í greinargerð með tillögunni fylgir taflan hér að neðan, sem sýnir breytingarnar sem lagðar eru til.

Í fundargerð fundar borgarráðs segir að tillögunni hafi verið vísað til umsagnar umhverfis- og skipulagssviðs.

Ætti að vera keppikefli að taka vel á móti þeim sem vilja lífga upp á borgina

Hildur segir að það ætti að vera borginni keppikefli að taka vel á móti þeim sem vilja lífga upp á hversdaginn og skapa ánægjulega upplifun fyrir fólkið í borginni.

„Ég hef því lagt til við borgarráð að gjaldtöku verði hætt af viðburðum sem skilgreindir eru verulegir eða minniháttar og að gjald vegna meiriháttar viðburða verði helmingað. Höfuðborgin á að vera aðlaðandi staður fyrir viðburðahald og hvers kyns íþyngjandi gjaldtaka og regluverk dregur auðvitað úr möguleikum á því að hér sé hægt að skapa lifandi borg með blómlegu mannlífi og menningarlífi.“