Lífið í LA smá eins og banda­rísk bíó­mynd

Fræg kvikmynd í framhaldsskólanum

Foreldrar Carmenar eru íslensk og starfa sem arkítektar í Los Angeles. Þau heita Tryggvi Þorsteinsson og Erla Dögg Ingjaldsdóttir og reka arkitektastofuna Minarc. Carmen fæddist árið 2002 í strandbænum Santa Monica í LA.

„Ég eyddi barnæskunni við sjóinn. Borgin hefur haft mikil áhrif á mig og það er eitthvað alveg sérstakt við það að alast upp við ströndina í bakgarðinum og sól alla daga.“

Kvikmyndaiðnaðurinn er auðvitað gríðarstór í Los Angeles og því er víða hægt að finna tengingar við dægurmenningu.

„Ég fór í framhaldsskóla þar sem kvikmyndin 17 Again með Zac Efron var tekin upp. Svo fór ég í háskóla í UC Berkeley og var í systrafélagi (e. sorority). Núna er ég að deita strák sem er í bræðralagi (e. Frat boy) og vinn í tónlistarbransanum í Los Angeles. Þetta er smá eins og í bandarískri bíómynd,“ segir Carmen og hlær.

Sólbað á morgnana og skíði á kvöldin

Hún segir að veðrið sé án alls efa það besta við borgina.

„Það er eiginlega alltaf gott, sem gerir allt aðeins léttara. Ég var mikið í íþróttum þegar ég var yngri, til dæmis í róðri og á brimbretti en það væri aðeins erfiðara að stunda það í tíu metra snjóstormi í janúar á Íslandi. 

Svo er líka hægt að fara á ströndina í sólbað um morguninn og upp á fjall á skíði seinna sama daginn sem er auðvitað magnað.“

Hún segir að fjölbreytileikinn sé þó það sem hún kunni mest að meta við Los Angeles.

„Ég ólst upp í samfélagi þar sem fólk var hvatt til að vera nákvæmlega það sem það er og það hefur haft djúp áhrif á það hvernig ég horfi á heiminn.“

Hún segir að fjarlægðin frá Íslandi geti þó stundum verið krefjandi.

„Bæði bókstaflega og menningarlega. Stundum vill maður bara skreppa í sund, fá sér ís í ísbúð Vesturbæjar eða kíkja í kaffi til ömmu og afa. 

LA getur líka verið pínu performatívt, allt er fallegt á yfirborðinu en maður verður að læra að halda fast í sína jarðtengingu og sinn veruleika.“

Ógleymanlegt fyrsta Coachella með Laufeyju

Carmen hefur unnið með súperstjörnunni Laufeyju undanfarin ár og er starfið sannarlega fjölbreytt.

„Við erum báðar hluti af íslenska samfélaginu hér í LA. Alexandra Sif eldri systir mín bjó á Íslandi áður en hún flutti aftur út til LA og hún þekkti til Laufeyjar, út frá því fór þetta af stað og það þróaðist náttúrulega áfram,“ segir Carmen um samstarfið. 

„Svo hjálpar að ég kann að tala islensku og eigi bæði íslenskt og bandarískt vegabréf.“

Hjá Carmen er enginn dagur eins.

„Það er ekkert sem heitir venjulegur dagur. Við erum alltaf annað hvort á tónleikum, í ferðalagi eða að undirbúa eitthvað nýtt og spennandi. Ég vakna yfirleitt snemma, næ mér í kaffi, fer á æfingu og tek svo daginn eins og hann kemur.

Starfið mitt er mjög svo fjölbreytt og ég sé um alls konar verkefni, allt frá skipulagi viðburða yfir í að styðja við sköpunarferlið. 

Það er krefjandi en ég elska að vera hluti af einhverju stærra. Það stendur sérstaklega upp úr þegar maður sér lag verða til frá fyrstu hugmynd og alla leið yfir á svið.“

Carmen fór með Laufeyju og teyminu á tónlistarhátíðina Coachella í apríl. Hátíðin er ein sú allra stærsta og þangað mæta flest allar stærstu stjörnur í heiminum.

„Þetta var smá óraunveruleg upplifun. Þetta var í fyrsta skipti sem ég fer á Coachella og ég fór beint á VIP svæðið baksviðs sem er á listamannasvæðið. Svo sá ég tónlistarkonuna Charli XCX koma fram og hún er klikkuð á sviði. Ég elska hana.

Við deildum svæði með Natöshu Bedingfield, Cynthia Erivo og LL Cool J. Það er eitthvað við það að sjá svona stórstjörnur í sínu náttúrulega umhverfi og fatta að allir eru bara fólk. Það var fallegt og ógleymanlegt.“

Tekur Ísland með sér til LA

Carmen hefur ótrúlega gaman að því að lifa og hrærast í listasenunni og það er ýmislegt sem stendur upp úr.

„Það er eitthvað svo magnað að verða vitni að því hvernig list lifnar við. Ég hef fengið að vera hluti af ferlinu þegar Laufey býr til lög, allt frá fyrstu nótunni á píanóinu til fullunninnar upptöku. 

Og svo þegar hún stendur á sviðinu og fólk grætur úr þakklæti, það er ólýsanlegt. Það minnir mann á hvers vegna list skiptir máli.“

Aðspurð hvort hún sjái fyrir sér að flytja einhvern tíma aftur til Íslands segir Carmen:

„Aldrei segja aldrei. Ég elska Ísland. Fjölskyldan mín er þar, menningin og fólkið, allt þetta gerir landið svo einstakt. Það kæmi mér ekkert á óvart ef ég myndi flytja þangað einhvern daginn.

Ég held þó að ég hafi alveg staðið mig vel í að færa smá Ísland með mér til LA. Ég hélt 17. júní partý heima hjá mér og kynnti vini mína fyrir íslenskri menningu. 

Propsin fara samt beint á mömmu, hún var svo ótrúlega dugleg að halda tungumálinu og menningunni lifandi fyrir okkur.“

Carmen nýtur lífsins til hins ítrasta og segist ekki alveg viss um hver hennar framtíðardraumur er.

„Ef ég má láta mig dreyma þá væri það líklega að eiga lítinn vínbar, þar sem góð tónlist, gott vín og stemning mætast.“