Lífið

Tón­leikar Lady Gaga æðis­legir og öryggisgæslan svaka­leg

Lovísa Arnardóttir skrifar
Þórhallur segir stemninguna hafa verið gríðarlega í borginni í aðdraganda tónleikanna og á meðan þeim stóð.
Þórhallur segir stemninguna hafa verið gríðarlega í borginni í aðdraganda tónleikanna og á meðan þeim stóð. Aðsend og Vísir/EPA

Þórhallur Steingrímsson fór ásamt konu sinni, Mariu Gomes Rodrigues, á ókeypis tónleika með söngkonunni Lady Gaga í gær í Rio de Janeiro í Brasilíu. Áætlað er að tvær milljónir manna hafi verið viðstödd tónleikana sem fóru fram í gær. Þórhallur varð ekki var við handtökur vegna sprengjutilræða en segir öryggisgæsluna hafa verið gríðarmikla. 

Hann og konan hans búa núna í Leblon sem er í um tuttugu mínútna fjarlægð frá Copacabana ströndinni í Rio de Janeiro í Brasilíu þar sem tónleikarnir fóru fram.

„Við erum búin að búa hérna í rúmt ár núna en höfum alltaf átt íbúð. Það var allt lokað í kring. Aðalgöturnar með fram ströndinni. Það var allt lokað og það var allt troðfullt,“ segir Þórhallur.

Áætlað er að um tvær milljónir hafi komið saman til að horfa á tónleikana. Gaga sjálf segir í færslu á samfélagsmiðlum að aldrei hafi fleiri komið saman til að sjá konu koma fram. Vísir/EPA

Hlustuðu á tónleikana á veitingastað

Hann og konan hans settust saman á veitingahús skammt frá tónleikunum sjálfum og hlustuðu þaðan. Þórhallur nennti ekki sjálfur að labba nær þeim en konan hans fór nær og tók nokkrar myndir.

Borgaryfirvöld greiddu fyrir tónleikana í þeim tilgangi að lífga við efnahag borgarinnar. Þórhallur er viss um að þeim tilgangi hafi verið náð. Gríðarlegur fjöldi ferðamanna hafi verið í borginni fyrir og á meðan tónleikunum stóð.

„Fólk var gríðarlega spennt fyrir þessu og alveg alla síðustu viku löbbuðum við niður á strönd og við vorum endalaust að hitta fólk sem var komið til að far á tónleikana. Tónleikarnir eru ókeypis en allur þessi fjöldi eyðir pening sem kemur í ríkiskassann,“ segir Þórhallur.

Götusalar hafi staðið við allar götur og selt varning og fólk skemmt sér á götum úti síðustu daga.

Tveir voru handteknir á tónleikunum grunaðir um að hafa skipulagt umfangsmikla sprengjuárás. Í erlendum fréttum segir að hópurinn sem stóð að baki árásinni hafi undanfarið deilt hatursáróðri gegn hinsegin samfélaginu, börnum og ungmennum.

„Við yrðum ekki vör við þetta en það var svakaleg öryggisgæsla í kringum tónleikasvæðið,“ segir hann.

Þórhallur stillir sér upp nærri tónleikasvæðinu.Aðsend

Göngubrú frá hótelinu að sviðinu

Söngkonan hafi sjálf gist á hóteli beint á móti sviðinu.

„Það var búið að byggja göngubrú frá hæðinni þar sem hún gisti yfir og beint á sviðið,“ segir hann og að söngkonan hafi getað gengið beint frá hótelinu á sviðið og svo aftur til baka.

„Hún þurfti aldrei að fara niður á götu.“

Þórhallur segist ekki stór aðdáandi Lady Gaga en þessir árlegu tónleikar séu alltaf skemmtilegur viðburður. Hann kannist þó vel við lögin hennar og kunni að meta tónlistina.

„Þetta var æðisleg upplifun og ég hlakka til næsta árs.“

Hann segir þetta góðan tíma til að heimsækja borgina hafi fólk hug á því. Þetta sé árlegur viðburður og alltaf skemmtilegur tími. Þá segir hann einnig gaman að heimsækja hana í kringum jól og áramót eða í febrúar þegar karnivalið fer fram.

„Karnivalið er alltaf algjörlega magnað. Við höfum nokkrum sinnum verið hér á þeim tíma og það er alltaf magnað. Það er að koma vetur núna og þá lækkar hitinn. Ef fólk vill koma á ódýrari tíma er gott að koma núna.

„Það er að koma vetur núna,“ segir hann en þó með þeim fyrirvara að hitastigið helst áfram í kringum tuttugu stig.

Konan vill ekki að hann fari einn út

Hann segist alltaf upplifa sig öruggan í borginni en segir þó mikilvægt að fara ekki út með mikil verðmæti á sér.

„Mér finnst ég alltaf öruggur og sérstaklega ef ég er með konunni minni. Hún vill samt ekki að ég fari mikið einn út. Það er talsvert um glæpi þannig ég forðast að vera með verðmæti á mér. Tek til dæmis alltaf úrið af mér.“






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.