Satt eða logið um stefnu­ræðu for­sætis­ráð­herra?

Jóhann Páll útlistaði helstu verkefni ríkisstjórnarinnar og sagði markmiðið skýrt: „Að stækka kökuna og styrkja velferðina“.

Ráðherra var heitt í hamsi og ítrekaði meðal annars að ríkisstjórnin stæði með flugvelli í Vatnsmýrinni, á meðan önnur lausn væri ekki fundin. Þá hefði hún fengið til liðs við sig 4.000 manns „í hugamyndavinnu um hagræðingu í ríkisrekstri“.

Margar hugmyndanna hefðu komið frá fólki í kerfinu, sem væri steinhissa á því hvernig fjármunum hefði verið varið hingað til og hvernig fyrrverandi stjórnarflokkar hefðu farið með vald sitt. Þeir sem sætu nú í ríkisstjórn væru hins vegar ekki í pólitík til að kaupa sér vinsældir um stundarsakir, heldur til að ná árangri fyrir land og þjóð.

„Auðvitað mætum við andstöðu,“ sagði Jóhann Páll. „Það fyrsta sem heyrðist frá Sjálfstæðisflokknum var gagnrýni á að ný ríkisstjórn ætlaði að binda lífeyri við laun og tryggja eldra fólki og öryrkjum samskonar hækkanir og verða á vinnumarkaði. Og formaður Framsóknarflokksins, háttvirtur þingmaður sem kom ekki einum einustu jarðgöngum af stað hérna á sjö árum og sat í ríkisstjórn sem kom ekki einum einustu virkjanaframvæmdum yfir tíu megavött af stað á sjö árum, hann sakar núna nýja ríkisstjórn um andlandsbyggðarstefnu. Er það nú!

Og reyndar beit hann höfuðið af skömminni með því að ljúga því blákalt hérna að þingheimi að hæstvirtur forsætisráðherra hefði ekki ávarpað kennara í ræðu sinni, hefði ekki vikið að menntamálum eða ávarpað kennara þarna úti, sem hún gerði svo sannarlega. Það er lágt risið á stjórnarandstöðunni hér í kvöld,“ sagði Jóhann Páll.

Þingmenn eigi að fá ræðuna afhenta eins og hún verður flutt

Jóhann Páll vísar þarna til Sigurðar Inga Jóhannssonar en þess ber að geta að Sigurður Ingi sagði í ræðu sinni að „í útsendri stefnuræðu“ Kristrúnar Frostadóttur forsætisráðherra hefði ekkert verið vikið að stöðu kennara og barna og mögulegu allsherjarverkfalli.

Sigríður Á. Andersen, fyrrverandi ráðherra og núverandi þingmaður Miðflokksins, gagnrýndi það á X/Twitter í gær að stefnuræðan hefði breyst frá því að henni var dreift til þingmanna fyrir viku síðan.

„Þetta er algjörlega óforsvaranlegt,“ sagði Sigríður í samtali við fréttastofu en ríkisstjórnin hafi í tvígang brotið gegn þingskaparlögum á síðustu dögum; annars vegar þegar þingmenn fengu ekki þingmálaskrá ríkisstjórnarinnar fyrr en hún var gerð opinber og hins vegar þegar þeir voru ekki upplýstir um breytingar á stefnuræðu forsætisráðherra.

Bæði plögg ættu þingmenn að fá afhent með fyrirvara til að geta kynnt sér þau í friði og undirbúið sig. 

Sigríður sagði algjöra vitleysu að kalla það „drög“ sem þingmenn fengju afhent; þeir ættu að fá ræðuna eins og hún yrði flutt. Umrædd mistök væru til marks um reynsluleysi.

Í lögum um þingsköp Alþingis er sannarlega kveðið á um að „eftirrit af ræðunni skal afhent þingmönnum sem trúnaðarmál tveimur sólarhringum áður en hún er flutt“. Eftir því sem fréttastofa kemst næst var eftirfarandi málsgrein í stefnuræðu forsætisráðherra hins vegar ekki bætt við fyrr en í gær:

„Og þó að forsætisráðherra komi ekki með beinum hætti að gerð kjarasamninga þá hefur þessi ríkisstjórn lýst sig reiðubúna til að liðka fyrir samningum við kennara með því að standa einhuga að því að flýta virðismatsvegferð og með því að flýta aðgerðum í menntamálum til að taka á breyttri stöðu í skólasamfélaginu og bæta aðstæður kennara og nemenda. Við skiljum þörfina og við skiljum líka að traustið er laskað og nú þarf að byggja það upp að nýju.“

Þannig talaði forsætisráðherra sannarlega til kennara í gær en ekki í útsendu útgáfunni, eins og Sigurður Ingi vék að.