Frið­rik Ómar og Hera skilja ekkert í úr­slitunum

„Ég er með endalaust af skilaboðum, ég er bara að reyna að fara í gegnum þau öll,“ segir Birgitta í Bítinu á Bylgjunni. Hún flutti lagið sitt Ég flýg í storminn síðastliðið laugardagskvöld í fyrri undanúrslitum keppninnar. Þrjú af fimm lögum fóru áfram, það voru Róa með Væb bræðrum, Frelsið mitt með Stebba Jak og lagið Eins og þú með Ágústi.

Hafi átt fullt erindi áfram

Það er óhætt að fullyrða að eftirseta Birgittu hafi vakið mikla athygli. Í sérlegum aðdáendahópi Eurovision nörda á Facebook hafa yfir hundrað manns brugðist við færslu þar sem fullyrt er að Eurovision heimurinn sé í sjokki vegna málsins.

„Á maður að trúa því að svona flutningur komist ekki, þó í það minnsta, áfram á úrslitakvöldið?“ spyr Jóhann Már Sigurbjörnsson í hópnum og fjölmargir taka undir. Sömu sögu er að segja af athugasemdum erlendra Eurovision aðdáaenda sem keppast við að lýsa yfir furðu vegna málsins á Youtube við myndband af sviðsframkomu Birgittu.

„Hvað er á seyði á Íslandi? Er ykkur alvara? Þetta er meistaraverk,“ skrifar einn hinna erlendu aðdáenda. Annar gengur svo langt að fullyrða að lagið hafi verið það besta í ár, ekki á Íslandi, heldur í gervallri keppninni.

Og það eru ekki bara íslenskir og erlendur aðdáendur sem eru á þessari skoðun vegna þess að alvöru Eurovision kanónur og reynsluboltar hafa að sama skapi undrast það að Birgitta hafi ekki komist áfram. Þar á meðal er Friðrik Ómar, Eurovision-fari með meiru.

„Eftir að hafa horft aftur á fyrra undanúrslitakvöld Söngvakeppninnar í gær er ég sannfærður um það að Birgo og lagið „Ég flýg í storminn“ er einhver flottasti vocal performance í keppninni fyrr og síðar,“ skrifar Friðrik Ómar og ljóst að hann veit sínu viti. Hann segir ömurlegt að Birgitta verði ekki á lokakvöldinu, frammistaða hennar hafi verið „next-level.“

Færslan hefur vakið mikla athygli og taka margir undir, meðal annars Hera Björk fulltrúi Íslands í Eurovision í fyrra og sannkölluð Júrókempa. Hún segist sammála, atriði Birgittu hafi verið geggjað og hafi átt fullt erindi áfram. Grétar Örvarsson tónlistarmaður tekur undir og það gera líka Jóna Hrönn Bolladóttir prestur og söngkonan Erna Hrönn.

Ljóst er eftir breytingar á reglum Söngvakeppninnar sem kynntar voru fyrr á árinu að Birgitta á ekki lengur séns á því að komast áfram. Síðustu ár hefur eitt lag, svokallað „wild-card,“ sem ekki komst áfram í úrslit verið valið af stjórn Söngvakeppninnar áfram í úrslitin. Í ár hefur verið tekið fyrir það auk þess sem úrslitaeinvígið svokallaða er á bak og burt. 

Peppið hjálpar við að takast á við vonbrigðin

Í Bítinu á Bylgjunni lýsir Birgitta því að hún hafi fengið ógrynni af skilaboðum eftir keppnina. Allt séu þetta hvetjandi og peppandi skilaboð. Hún segist líka hafa lesið margar jákvæðar athugasemdir.

„Af því að það er auðvitað sorg að lenda í því að detta út þegar þetta er svona mikill draumur, þannig að það peppar mann bara áfram og svo er fólk líka að hvetja mann til að koma og taka aftur þátt á næsta ári og það er mögulega í plönum,“ segir Birgitta sem skaust fyrst upp á stjörnuhiminninn í Idol.

Hún segist hafa séð þó nokkra svekkja sig á því að hafa ekki kosið þar sem þeir hafi gefið sér að hún myndi komast áfram. Birgitta segir ekkert við þessu að gera en að sætta sig við orðinn hlut og halda áfram. Birgitta segist hafa nóg fyrir stafni en hún er meðal annars í tónlistarnámi í Bretlandi.

„Ég bara held áfram að gefa út á fullu. Ég ætla að fara all in og nýta þetta tækifæri, þar sem Ísland og öll Evrópa er að styðja við bakið á mér. Þannig það eru spennandi tímar framundan.“