Skurð­læknir grunaður um kyn­ferðis­brot gegn 299 börnum

Skurðlæknirinn Joel Le Scouarnec, 73 ára, er grunaður um að hafa beitt 299 börn kynferðisofbeldi. Hann hefur verið ákærður fyrir yfir hundrað nauðganir og yfir 150 önnur kynferðisbrot, sem hann er sagður hafa framið á mörgum áratugum.

Fjölskylda Le Scouarnec er sögð hafa vitað um hegðun hans í mörg ár og þá leikur grunur á um að samstarfsmenn læknisins og stofnanir þar sem hann vann hafi hylmt yfir með honum.

Talið er að í flestum tilvikum hafi Le Scouarnec brotið gegn börnunum á meðan þau voru undir svæfingu en skurðlæknirinn sérhæfði sig í aðgerðum á botnlanga. Það voru dagbækur Le Scouarnec sem komu upp um umfang brotanna og mörg barnanna, sem eru fullorðin í dag, höfðu ekki hugmynd um að hann hefði brotið gegn þeim fyrr en lögregla hafði samband.

Hefði getað verið stöðvaður árið 2004

Brot Le Scouarnec eru sögð hafa staðið yfir frá 1989 til 2014 en árið 2017 var hann handtekinn eftir að sex ára stúlka greindi foreldrum sínum frá því að hann hefði beitt hana kynferðisofbeldi.

Le Scouarnec var ákærður fyrir brot gegn stúlkunni, ungum ónafngreindum sjúklingi og tveimur barnungum frænkum sínum og dæmdur í fimmtán ára fangelsi árið 2020.

Í kjölfar handtöku læknisins árið 2017 var húsleit gerð á heimili hans, þar sem lögregla fann fjölda kynlífsdúkka í barnastærð, yfir 300 þúsund myndir af barnaníð og fjölda dagbóka þar sem Le Scouarnec hafði haldið nokkurs konar „bókhald“ yfir fórnarlömb sín.

Le Scouarnec hefur játað einhver brot en neitað sök að stórum hluta og segir dagbækurnar lýsa „fantasíum“.

Læknirinn starfaði meðal annars á opinberum og einkareknum sjúkrahúsum í Bretaníu og í vesturhluta Frakklands á umræddum árum og virðist hafa fengið að halda áfram brotum sínum óáreittur, jafnvel þótt margt benti til þess að ekki væri allt með felldu.

Árið 2004 gerði Alríkislögreglan í Bandaríkjunum til að mynda frönskum yfirvöldum viðvart um að Le Scouarnec hefði verið að skoða barnaníðsefni á djúpvefnum. Hann var dæmdur í fjögurra ára skilorðsbundið fangelsi í kjölfarið en fékk áfram virðuleg störf þar sem hann vann með börnum.

Þá létu tveir samstarfsmenn Le Scouarnec vita af því árið 2006 að hann hefði hlotið dóm og að hann hefði verið að skoða barnaníðsefni í vinnunni. En stjórnendur virðast hafa virt ábendingarnar að vettugi.

Mismeðvituð um ofbeldið

 Af börnunum 299 voru 158 drengir og 141 stúlka. Alls voru 256 yngri en 15 ára og meðalaldurinn var 11 ára.

„Fjöldi barna var á skurðstofunni, undir svæfingu, að jafna sig eftir skurðaðgerð, undir deyfingu eða sofandi, sem þýðir að þau gerðu sér ekki grein fyrir því hvað var gert við þau,“ segir Stéphane Kellenberger, saksóknari í Lorient.

Lögmenn þolendanna og fjölskyldna þeirra hafa stigið fram og greint frá upplifun skjólstæðinga sinna, sem eru afar ólíkar. Sumir þeirra voru meðvitaðir um og upplifðu brotin, sumir höfðu verið í meðferð við tráma í barnæsku án þess að gera sér ekki fyllilega grein fyrir hvað hafði átt sér stað, en aðrir vissu ekki neitt fyrr en málið komst upp.

Francesca Satta, lögmaður tíu þolenda, segist telja málið einstakt á heimsvísu; að þetta sé í fyrsta sinn sem svo mörg fórnarlömb barnaníðings séu undir í einum réttarhöldum. Meðal skjólstæðinga Satta eru fjölskyldur tveggja manna sem sviptu sig lífi eftir að þeir voru upplýstir um brotin.

Það stóð þolendunum til boða að fá að heyra hvað Le Scouarnec skrifaði um ofbeldið gegn þeim í dagbækur sínar en sumir afþökkuðu. Þá hafa einhverjir sagt að þeir vildu óska þess að hafa aldrei verið upplýstir um málið.

Lækninum hefur verið lýst sem köldum og tilfinningalausum manni, sem hafi ekki sýnt neina iðrun við réttarhöldin í kjölfar handtöku hans árið 2017.

Gerðar hafa verið ráðstafanir til að þolendur, fjölskyldur þeirra og lögmenn geti fylgst með réttarhöldunum í þremur stórum sölum. Réttarhöldin eru talin munu taka um það bil fjóra mánuði og standa fram í júní.