Samið um flug til Eyja næstu þrjá vetur

Í tilkynningu þess efnis segir að Vegagerðin hafi boðið út flugleiðina Reykjavík – Vestmannaeyjar í júní 2024 og eitt tilboð hafi borist í verkið, frá Mýflugi ehf. 

Rúmar hundrað milljónir

Tilboðið hafi hljóðað upp á tæpar 108 milljónir króna fyrir þriggja ára tímabil. Um sé að ræða flug yfir vetrarmánuðina desember – febrúar og flogið verði fjórar ferðir í viku á milli Vestmannaeyja og Reykjavíkur.

Flugleiðin sé styrkt sérstaklega af ríkinu til að tryggja tímabundna lágmarksþjónustu á þessari leið á meðan markaðslegar forsendur eru ekki til staðar, enda sé flugið mikilvægt fyrir íbúa og atvinnulíf á svæðinu.

Gerður hafi verið samningur um flugið við Mýflug ehf. og hann taki gildi 1. desember 2024.