„Mikið af slæmum genum í landinu okkar“

Í útvarpsviðtali sem hann fór í í dag, sagði Trump fólk sem væri ólöglega í Bandaríkjunum og hefðu framið morð, gerðu það vegna gena þeirra.

„Það er mikið af slæmum genum í landinu okkar,“ sagði Trump svo í kjölfarið og hélt hann því fram að „þau“ hefðu hleypt 425 þúsund glæpamönnum inn í Bandaríkin.

Þar var hann, samkvæmt frétt Washington Post, að vísa í nýjar tölur sem opinberaðar voru á bandaríska þinginu en Trump og bandamenn hans halda því fram að Joe Biden, forseti, og Kamala Harris, varaforseti og mótframbjóðandi Trumps, hafi hleypt þrettán þúsund ólöglegum innflytjendum með morðdóm á bakinu inn í Bandaríkin.

Þá hafi 425 ólöglegum innflytjendum með dóm á bakinu verið hleypt inn í landið.

Þessar tölur eru þó sagðar ná áratugi aftur í tímann, löngu áður en Biden tók við embætti af Trump sjálfum og spannar tölfræðin einnig forsetatíð hans.

Ekki í fyrsta sinn

Þetta er ekki í fyrsta sinn sem Trump talar um farand- og flóttafólk með þessum hætti, eins og farið er yfir í frétt AP fréttaveitunnar. Hann hefur ítrekað lýst þeim sem „dýrum“, morðingjum og annars konar glæpamönnum. Þá hefur hann einnig haldið því fram að þetta fólk sé að breyta Bandaríkjunum til hins verra.

Í fyrra sagði hann til að mynda að ólöglegir innflytjendur „eitruðu blóð“ Bandaríkjanna, sem er orðræða sem einu sinni var notuð af Adolf Hitler. Trump sagðist eftir á ekki hafa vitað af því.

Árið 2020, þegar hann var á kosningafundi í Minnesota, þar sem íbúar eru langflestir hvítir á hörund, hrósaði hann gestum fundarins og öllum íbúum ríkisins fyrir „góð gen“ þeirra.

Þá hefur Trump, JD Vance, varaforsetaefni hans, og aðrir bandamenn hans ítrekað logið því á undanförnum vikum að innflytjendur frá Haíti, sem eru löglega í Bandaríkjunum, séu að éta gæludýr fólks.

Sjá einnig: Gerði sér mat úr kattaráti andlega veikrar konu

Í yfirlýsingu frá framboði Trumps segir að hann hafi eingöngu verið að tala um morðingja að þessu sinni, ekki allt farand- og flóttafólk.

Reiður og röflandi

Fjölmiðlar vestanhafs hafa sagt frá því að Trump sé reiðari á kosningafundum og annars staðar en hann hefur verið áður og að hann röfli mikið. Í frétt New York Times segir að það hafi vakið upp spurningar um aldur hans en Trump er 78 ára gamall.

Trump stærði sig nýverið af því að áhorfendur á kappræðum hans og Kamölu Harris, hafi ærst af ánægju vegna ummæla hans. Kappræðurnar fóru þó fram í tómum sal en þetta sagði Trump viku eftir að kappræðurnar fóru fram.

Sjá einnig: Trump vígreifur en veit betur

Þá fer Trump ítrekað úr einu í annað og klárar oft ekki setningar sínar. Hann hefur haldið langar einræður um hákarla, golf og ýmislegt annað, eins og „fallegan líkama“ sinn. Hann hefur einnig talað eins og hann sé í framboði gegn Joe Biden, sem steig til hliðar vegna aldurs fyrir fimm vikum áður en Trump talaði síðast eins og Biden væri enn í framboði.

Trump er einnig orðinn töluvert neikvæðari en hann hefur verið og blótar mun oftar.