Netanyahu heitir hefndum

Að minnsta kosti tvö hundruð skotflaugum var skotið að Ísrael frá Íran í dag. Viðvörunarlúðrar ómuðu víðsvegar í Ísrael og er útlit fyrir að þó nokkrar þeirra hafi náð í gegnum loftvarnir Ísraela og brak úr mörgum féll til jarðar.

Netanyahu segir að árásin hafi mistekist, þökk sé loftvarnarkerfi Ísraels.

„Stjórnendur í Íran skilja ekki hvað við erum ákveðnir í að verja okkur og hefna okkar ... þeir munu skilja að hver sá sem ræðst á okkur, við munum ráðast á þá,“ segir hann.

Þetta eigi við hvar sem Ísrael etji kappi við „illu öflin“ á Vesturbakkanum, Gasa, Líbanon, Jemen, Sýrlandi og Íran.

Hann kallar eftir því að öfl „hinna góðu“ í heiminum sameinist gegn stjórnvöldum í Tehran.

„Þau verða að standa með Ísrael. Valið hefur aldrei verið skýrara milli harðstjórnar og frelsis ... Ísrael er á hreyfingu og illu öflin eru á undanhaldi. Við munum gera allt sem í okkar valdi stendur til að sú þróun haldi áfram, til að markmið okkar náist í stríðinu,“ segir Netanyahu.

Umrædd markmið séu endurheimt allra gíslanna og að tryggja tilveru og framtíð Ísraelsíkis.