Davíð fær engin svör í bráð frá Golf­klúbbi Sand­gerðis

„Nei, ég er hættur við það. Það eru svo miklar rangfærslur og lygar í þessu þannig að ég ætla ekkert að svara þessu. Ég verð bara að sitja uppi með þennan Svarta-Pétur,“ segir Lárus Óskarsson í samtali við Vísi.

Lárus vill að öðru leyti ekkert láta hafa neitt eftir sér um málið. Vísir greindi frá því, í frásögn af því þegar Davíð Jónsson og synir hans tveir voru reknir úr klúbbnum í miðju meistaramóti, að til stæði að klúbburinn sendi frá sér yfirlýsingu vegna máls hans. Það verður ekki að svo stöddu máli. 

Lárus sagði að það gæti vel verið að þetta yrði tekið upp með tíð og tíma hjá aganefnd klúbbsins en það verður ekki strax.

Davíð lýsti því í ítarlegu samtali við Vísi að hann hafi sent klúbbnum bréf þar sem hann krefst skýringa á því hvers vegna honum var vikið úr klúbbnum. Hann hefur haft samband við bæði GSÍ og ÍSÍ sem hafa bent honum á að hann þurfi að fá skýringar frá Golfklúbbnum áður en lengra er haldið. En það gæti orðið bið á því að þær skýringar fái Davíð.