Halda samstöðutónleika á sama tíma og Ís­land keppir í Euro­vision

Elísabet segir tónleikana vera annan valkost fyrir þau sem ekki vilja horfa eða fylgjast með Eurovision í ár. Aðallega snúist þeir þó um samstöðu með fólkinu á Gasa sem hafi upplifað miklar hörmungar síðasta hálfa árið.

„Ég og Zoey vinkona mín vorum, eins og margir aðrir, vorum búnar að tala um að vera með tónleika fyrir Palestínu. Mín skoðun er að allar þjóðir hefðu átt að neita að taka þátt í Eurovision en ég get ekki breytt því. Þannig ég hugsaði bara um hvað ég gæti gert til að hjálpa og það væri hægt að vera með tónleika,“ segir Elísabet.

Allur ágóði til Rauða krossins og UNICEF

Viðbrögðin hafi ekki staðið á sér. Þau sem koma fram á tónleikunum eru GDRN, Emmsjé Gauti,, Ásgeir Trausti, Una Torfa, Ellen Kristjánsdóttir, Eyþór Gunnarsson, Systur, Lay Low, Sigríður Thorlacius, Svala Björgvins, Pálmi Gunnarsson og hljómsveitin TÁR. Kynnir á tónleikunum er leikkonan Íris Tanja Flygenring.

„Það er ótrúlegt hvað við erum heppin að eiga svona frábært tónlistarfólk sem vilja koma saman og sýna samstöðu,“ segir Elísabet. Allir tónlistarmennirnir gefa vinnuna sína. Allur ágóði rennur svo til UNICEF á Íslandi og Rauða kross Íslands og mannúðarstarfs þeirra á Gasa.

„Það eina sem þessir tónleikar snúast um er samstaða, að hjálpa á þann hátt sem við getum og að safna peningum. Það er svo hörmulegt ástandið. Maður er bara lamaður og vill gera allt sem maður getur til að hjálpa. Ég er svo þakklát að geta notað tónlistina í það,“ segir Elísabet.

Tónleikarnir séu tækifæri fyrir alla sem að þeim koma, tónlistarmenn, tæknifólk og áhorfendur, til að koma saman og sýna samstöðu.

Kölluðu eftir sniðgöngu

Á sama tíma og tónleikarnir fara fram fer fyrri undankeppni Eurovision fram í Malmö. Íslenski hópurinn er hluti af fyrri undankeppninni. Mikill fjöldi mótmælti þátttöku Íslands í keppninni í ár vegna þátttöku Ísrael. 

Kallað var eftir sniðgöngu en RÚV tilkynnti á meðan Söngvakeppninni stóð að þátttaka Íslands yrði metin í samráði við sigurvegara. Hera Björk var afdráttarlaus að hún myndi vilja fara út og fór hún með sigur af hólmi í Söngvakeppninni. Íslenski hópurinn er nú staddur í Malmö þar sem hann undirbýr keppni. 

Verðið á tónleikamiðanum er fjögur þúsund krónur en Elísabet segir að inn á miðasölusíðunni sé tengill á bæði hjálparstarf Rauða krossins og UNICEF á Íslandi og fólki sé frjálst að styrkja starf þeirra aukalega.

„Þetta snýst bara um samstöðu. Vissulega er það yfirlýsing að vera með þetta á sama tíma [og Eurovision innsk. blm.] en það hefur ekkert með keppandann að gera eða nokkuð annað.“