Mikill sam­dráttur á hagnaði Tesla

Það samsvarar um 155 milljörðum króna en fyrirtækið stóðst ekki væntingar fjárfesta vestanhafs, samkvæmt frétt Wall Street Journal. Áður en uppgjörið var birt hafði virði hlutabréfa Tesla dregist saman um 42 prósent á þessu ári.

Í frétt miðilsins segir að Elon Musk, forstjóri Tesla og stærsti hluthafi félagsins, sé undir miklum þrýstingi vegna samdráttarins og hann þurfi að gera betur grein fyrir framtíðarsýn sinni fyrir Tesla.

Í yfirlýsingu vegna ársfjórðungsuppgjörs Tesla segir að sala á rafmagnsbílum hafi ekki haldið í við væntingar en á sama tíma hefur samkeppni á markaði rafmagnsbíla aukist. Í yfirlýsingunni segir að forsvarsmenn annarra bílaframleiðenda hafi margir tekið þá ákvörðun að leggja meiri áherslu á tengiltvinnbíla sem gangi bæði fyrir rafmagni og eldsneyti.

Þá segir þar að á meðan aðrir séu að draga úr fjárfestingum sínum sé Tesla að fjárfesta í framtíðarvexti. Meðal annars á að flýta útgáfu nýrra bílategunda og þar á meðal ódýrari rafmagnsbíla. Vonast er til að þessar tegundir nái á markað um mitt næsta ár, sem er fyrr en áður stóð til.

Þær fregnir hafa leitt til hækkunar á virði hlutabéfa félagsins í dag.

Stjórn Tesla hefur farið fram á það við hluthafa að þeir samþykki á nýjan leik kaupréttarsamning sem gerður var við Musk árið 2018. Sá samningur var dæmdur ólöglegur í janúar en þar er um að ræða stærsta samning af þessu tagi sem gerður hefur verið við stjórnanda skráðs fyrirtækis í Bandaríkjunum.

Stjórnin hefur einnig beðið hluthafa um að samþykkja flutning félagsins frá Delaware til Texas en Musk fór fram á það eftir áðurnefndan úrskurð dómara í janúar.