Viðskipti innlent

Stefnir í stærsta ár Air Atlanta með allt að tuttugu breiðþotur

Kristján Már Unnarsson skrifar
Baldvin Már Hermannsson er forstjóri Air Atlanta.
Baldvin Már Hermannsson er forstjóri Air Atlanta. Sigurjón Ólason

Flugfélagið Air Atlanta hefur fest kaup á fimm nýjum breiðþotum, meðal annars til að nota í umfangsmiklu pílagrímaflugi. Forstjórinn segir stefna í að árið verði það allra stærsta í sögu félagsins með allt að tuttugu risaþotur í rekstri.

Í fréttum Stöðvar 2 voru höfuðstöðvar Air Atlanta í Kópavogi heimsóttar. Sennilega hafa fæstir Íslendinga flogið með því þótt það teljist næst stærsta flugfélag þjóðarinnar enda felst þjónusta þess einkum í því að fljúga fyrir önnur flugfélög og félög í fraktþjónustu.

Fyrsta Boeing 747-þota Air Atlanta kom til Keflavíkur vorið 1993.Stöð 2/Billi

Það þótti stórt stökk þegar Atlanta fékk sína fyrstu Boeing 747 þotu fyrir rúmum þrjátíu árum. Hún var merkt Saudia-flugfélaginu, kaupanda þjónustunnar, en skráð á Íslandi, TF-ABK, og hlaut nafnið Agnar Kofoed-Hansen.

Í fyrra urðu önnur tímamót í sögu Atlanta þegar það fyrst íslenskra félaga tók Boeing 777-breiðþotuna í notkun, raunar tvær, einnig til að fljúga fyrir Saudia. Núna eru tvær aðrar 777 að bætast við.

Fyrsta Boeing 777-vél Air Atlanta í Jeddah í Sadí-Arabíu í fyrra. Núna verður félagið með fjórar slíkar í pílagrímaflugi fyrir Saudia-flugfélagið. B-777 er stærsta tveggja hreyfla þota sögunnar og stærsta flugvél heims í fjöldaframleiðslu eftir að smíði B-747 og Airbus A380 var hætt.Air Atlanta/Magnús Sigurðsson

„Við erum með teymi núna í Bandaríkjunum sem er að vinna að móttöku á þessum tveimur viðbótarvélum og gerum ráð fyrir að þær verði klárar núna í maí-júní,“ segir Baldvin Már Hermannsson, forstjóri Air Atlanta.

Atlanta verður jafnframt með tvær 747-farþegaþotur í pílagrímafluginu.

Boeing 777-þotur Air Atlanta eru með allt að 492 farþegasæti.Air Atlanta/Magnús Sigurðsson

„Allar sex verða notaðar í pílagrímafluginu. Svo munum við eitthvað taka af áætlunarflugum fyrir okkar kúnna, Saudia, líka, inn á milli. En uppleggið er, svona næstu þrjá mánuðina, þegar pílagrímaflugið fer af stað, er að fyrst og fremst fókusa á pílagrímana.“

Þá hefur Atlanta einnig fest kaup á þremur 747-fraktþotum, sem afhentar verða í haust.

„Það er rétt, 747-400, framleiddar sem fraktvélar. Við kaupum þær frá China Airlines. Þetta eru vélar sem eru að bera allt upp undir 120 tonn, með gríðarlega flutningsgetu.“

Air Atlanta hefur haft um eitthundrað Boeing 747-þotur í þjónustu sinni á þrjátíu árum.Wikiwand

Flugflotinn stefnir í að verða allmyndarlegur og eingöngu breiðþotur.

„Fraktvélarnar verða fjórtán talsins, sem eru veruleg umskipti frá því sem var bara fyrir covid þegar við vorum í fjórum – fimm. Þannig að við verðum þá komnir upp í fjórtán vélar.

Og farþegaflotinn verður þá að lágmarki fjórar vélar og jafnvel sex, eftir því hvaða ákvarðanir við tökum í flotamálum á komandi hausti,“ segir Baldvin.

Flugumsjón Air Atlanta í Kópavogi gerir flugáætlanir, reiknar út eldsneytisþörf, flutningsgetu, sækir veðurspár og vaktar svo hverja flugferð.Sigurjón Ólason

Starfsmannafjöldinn stefnir yfir eittþúsund manns, þar af starfa um þrjúhundruð Íslendingar hjá félaginu, en yfir eitthundrað manns vinna í höfuðstöðvunum í Kópavogi.

„Þetta er heljarinnar átak og mikil vinna, bæði við að koma vélunum í gott stand áður en þær koma inn í reksturinn, þjálfa mannskap, gera allt klárt hérna innandyra og erlendis.

Við munum vera með í kringum 1.200 til 1.300 manns í vinnu í það heila þegar útgerðin verður komin á fullt. Já, þetta er heljarinnar útgerð.“

Áhafnavakt Air Atlanta á að tryggja að flugmenn fljúgi innan tímamarka og fái lögbundna hvíld.Sigurjón Ólason

Raunar stefnir í stærsta ár Air Atlanta.

„Í dag erum við að fljúga meira heldur en við höfum nokkurn tíma gert áður, hvort sem það er í fjölda flugstunda eða lengd fluga. Við erum að fljúga verulega mikið og ég held að ef allt fer sem horfir þá mun þetta ár, 2024, verða okkar allra stærsta ár,” segir Baldvin Már Hermannsson, forstjóri Air Atlanta.

Hér má sjá frétt Stöðvar 2:

Air Atlanta Fréttir af flugi Sádi-Arabía Kópavogur Boeing

Tengdar fréttir

Íslenskt flugfélag fjórði stærsti flugrekandi júmbó-þotunnar

Framleiðslu júmbó-risaþotunnar hefur nú verið hætt og hefur síðasta Boeing 747-þotan verið afhent frá verksmiðjunum. Í upprifjun erlendra fjölmiðla á yfir hálfrar aldar sögu hennar hefur komið fram að íslenskt flugfélag er í fjórða sæti yfir stærstu flugrekendur þessarar einstöku flugvélar.

Air Atlanta sendir þrjár júmbó-þotur í niðurrif

Forsvarsmenn Flugfélagsins Air Atlanta hafa ákveðið að láta rífa þrjár af sjö Boeing 747-400 farþegaþotum félagsins. Þoturnar eru á bilinu 18 til 23 ára gamlar og hafa að undanförnu verið í þjónustu Saudia-flugfélagsins, ríkisflugfélags Sádi-Arabíu.

Atlanta stofnar nýtt flugfélag á Möltu

Forsvarsmenn íslenska Flugfélagsins Atlanta ehf. hafa ákveðið að stofna nýtt flugfélag á Möltu, sem hlotið hefur nafnið Air Atlanta Europe.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið