Viðskipti innlent

Fékk greiddar um tíu milljónir í við­bótar­laun

Lovísa Arnardóttir skrifar
Starfsmenn spítalans fengu, til dæmis, viðbótargreiðslur fyrir að klæðast hlífðarfatnaði á meðan heimsfaraldrinum stóð.
Starfsmenn spítalans fengu, til dæmis, viðbótargreiðslur fyrir að klæðast hlífðarfatnaði á meðan heimsfaraldrinum stóð. Mynd/Þorkell Þorkelsson

Starfsmaður Landspítalans fékk tæpar tíu milljónir í viðbótarlaun árið 2022. Það er hæsta greiðslan sem greidd hefur verið á launategundinni „viðbótarlaun á grundvelli stofnanasamninga“ á Landspítalanum síðustu fjögur ár.

Þetta kemur fram í svari Þórdísar Kolbrúnar R. Gylfadóttur, fjármála- og efnahagsráðherra, til Eyjólfs Ármannssonar, þingmanns Flokks fólksins, um greiðslu viðbótarlauna til starfsmanna ríkisins.

Þar kemur einnig fram að mikla fjölgun þeirra sem hefur síðustu ár þegið slíkar greiðslur megi rekja til mönnunarvanda og álags sem skapaðist í kjölfar Covid-19 heimsfaraldursins.Alls hafa verið greiddir síðustu fjögur árin um 4,5 milljarðar í viðbótarlaun á grundvelli stofnanasamninga. Af þeim hafa um 3,5 þeirra verið greiddir til starfsmanna á Landspítalanum. Árið 2020 voru greiddar 395 milljónir, þar af 149 til Landspítalans. 

Árið 2021 voru greiddar 236 milljónir alls og ekkert til starfsmanna Landspítalans. Árið 2022 voru greiddir 2,4 milljarðar og þar af 2,2 til Landspítalans. Í fyrra voru svo alls greiddir 1,4 milljarðar og þar af 1,2 til starfsmanna Landspítalans.

Í svari ráðherra kemur einnig fram hversu margar kennitölur eru að baki þessara greiðslna en árið 2020 fengu 2.574 greiðslu vegna viðbótarlauna, 1.165 árið 2021 og svo um fimm þúsund í fyrra og árið áður, 2022.

Mismikið greitt

Ef tekið er dæmi um árið 2020 er um 149 milljónir að ræða sem fóru til 1.191 einstaklinga. Að meðaltali væri það þá um 125 þúsund krónur á hvern einstakling.

Árið 2022 fengu 4.184 einstaklingar viðbótargreiðslur sem væru þá um hálf milljón að meðaltali ef upphæðinni er deilt jafnt á alla. Það var alls ekki gert þannig því fram kemur í svarinu að samkvæmt upplýsingum úr launakerfi ríkisins hafi hæsta greiðsla til starfsmanns sem telst til viðbótarlauna numið samtals 9.743.550 kr. á launategundinni „viðbótarlaun á grundvelli stofnanasamninga“ og hafi verið greidd árið 2022 á Landspítalanum.

Greidd eru viðbótarlaun vegna álags. Vísir/Vilhelm

Mikið hefur verið fjallað um svokallaðar viðbótargreiðslur síðustu mánuði eftir að greint var frá slíkum greiðslum til starfsmanna Skattsins. Tilkynnt var í síðasta mánuði að hætt yrði að greiða bónurgreiðslur til starfsmanna þar. 

Tvö ný launaþrep taka við af bónusgreiðslum

Fram kemur í svari ráðherra að greiðslurnar hafi takmarkast af tveimur prósentum af launasummu starfsfólks Skattsins sem tilheyrði stéttarfélögum BHM og að fjórðungur þeirra hafi getað fengið greiðslu í hvert og eitt skipti. Greiðslurnar hafi verið framkvæmdar tvisvar á ári og hafi numið hálfri milljón. Allir fengu sömu greiðslu. 

Eftir að kerfið var lagt af var gerð breyting á stofnanasamningi og var tveimur launaþrepum bætt við í stað þessara viðbótarlauna, annars vegar bætist við launaþrep eftir þrjú ár í starfi og hins vegar launaþrep eftir fimm ár í starfi.

Faraldur kórónuveiru (COVID-19) Landspítalinn Efnahagsmál Kjaramál

Tengdar fréttir

Bónusar hjá Skattinum „skelfi­legt for­dæmi“

Skafti Harðarson, formaður Samtaka skattgreiðenda, segir bónuskerfi Skattsins siðlaust og spillt. Starfsfólk Skattsins væri opinberir eftirlitsaðilar og ætti að gæta að hlutleysi. Því væri stefnt í hættu með bónusunum. Skatturinn greiddi 260 milljónir í bónusa á síðustu fjórum árum.

Siðlausar bónusgreiðslur Skattsins

Það er með öllu siðlaust að starfsmenn Skattsins skuli fá greiddan bónus, eins og fram hefur komið í fjölmiðlum, hvað þá að slíkur bónus byggist á markmiðum um endurálagningu á einstaka skattgreiðendur (einstaklinga og lögaðila) og þá líklega álagi sem lagt er ofan á slíkar greiðslur.

Læknar vilja við­bótar­greiðslur í sam­ræmi við álag

Læknar vilja breytinga á kjarasamningum og leggja til viðbótargreiðslur í samræmi við aukið álag. Mikið hafi mætt á heilbrigðisstarfsfólki í kórónuveirufaraldrinum og læknar segja eðlilegt að hluti þeirra fjármuna sem fallið hafa til samfélagsins í faraldrinum fari einnig til heilbrigðisstarsfólks.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið