„Niður­læging“ fyrir ís­lenska ríkið að sjálf­boða­liðar sjái um vinnuna

Mikil ringulreið skapaðist á Nasser sjúkrahúsinu eftir að sérsveit Ísraelshers réðst þar inn í dag. Á myndefni af sjúkrahúsinu sést að gangar þess voru rykmettaðir og brak á gólfum. Yfirlýst markmið hersins var að sækja lík ísraelskra fanga Hamas-samtakanna, sem ísraels yfirvöld segja að hafi verið haldið föngum á sjúkrahúsinu.

Bæði Hamas og starfsmenn spítalans hafa hafnað því að gíslum hafi verið haldið þar. Læknar segja að skotið hafi verið á þá í árásinni. Minnst einn sjúklingur hafi verið drepinn og líf annarra í mikilli hættu.

Hópur íslenskra sjálfboðaliða, sem nú vinnur að því að aðstoða Palestínumenn sem fengið hafa dvalarleyfi á Íslandi á grundvelli fjölskyldusameiningar, er staddur í Kaíró og mun á næstu dögum aðstoða 12 yfir landamærin eins og greint var frá fyrr í dag.

Átakanlegar aðstæður

Einn sjálfboðaliðanna segir mjög erfitt að fylgjast með því sem gengur á hinum megin landamæranna.

„Við erum að horfa á þjóðarmorð í beinni útsendingu. Örvæntingin er mjög mikil hjá fólkinu þar og fjölskyldumeðlimum þeirra sem hafa fengið samþykkta þessa fjölskyldusameiningu en fá ekki fjölskylduna sína út af Gasa. Við erum í kappi við tímann og aðstæðurnar hér í Kaíró eru líka mjög erfiðar,“ segir Sema Erla Serdar, stofnandi hjálparsamtakanna Solaris. 

„Þær eru átakanlegar. Þetta er mjög erfitt og sorglegt allt, þó þetta sé ekki jafn flókið og íslensk yfirvöld vilja meina. Það er mikil örvænting í loftinu og við erum ekki ein hér í þessum erindagjörðum. Þetta er allt átakanlegt, fyrst og fremst.“

Hún segir sjálfboðaliðana vilja halda áfram sínum störfum þar til allir Palestínumenn, sem fengið hafa dvalarleyfi á Íslandi, hafa verið sóttir. Það gerist í hollum og mikil vinna að baki hverjum hópi sem tekst að koma heim.

„Það er mjög breiður hópur fólks sem stendur á bak við þetta verkefni og við erum hér fyrst og fremst vegna þess að almenningur hefur stutt þá söfnun sem var sett af stað til þess að við gætum reynt að sækja fólkið okkar og koma þeim af Gasa. Svo lengi sem við getum munum við halda áfram.“

Hafa ekki náð í utanríkisráðuneytið

Sema gagnrýnir jafnframt að íslensk stjórnvöld hafi ekki svarað kalli hópsins um samtal við erindreka utanríkisráðuneytisins sem eru úti í Kaíró. 

„Við höfum verið að vinna hér með þjónustuaðilum og fulltrúum, sem hjálpa okkur að koma fólki á þennan lista og yfir landamærin. Það má alveg gera ráð fyrir því að það taki nokkra daga fyrir þau svo að komast yfir. Við munum halda þessu verki áfram eins lengi og þörf er á en ítrekum að hér erum við að vinna skylduverk íslenskra stjórnvalda og ég vil lýsa yfir miklum vonbrigðum með það að við höfum ekki komist í neitt samband við utanríkisráðuneytið eða fulltrúa þeirra hér í Kaíró, þrátt fyrir ítrekaðar tilraunir til þess,“ segir Sema. 

Hópurinn vilji samræma aðgerðir sínar við það sem utanríkisráðuneytið er að gera. Þá séu aðgerðirnar ekki jafn flóknar og stjórnvöld vilji meina.

„Þá er það þrátt fyrir að við séum að vinna eftir mun erfiðari leiðum en íslensk stjórnvöld. Þau munu til dæmis ekki þurfa að greiða þessar sömu upphæðir og við þurfum að greiða ef þau myndu fara strax í þetta verkefni, sem þau eiga að vera löngu búin að klára. Það er þeim til háborinnar skammar að við séum hér að vinna þeirra vinnu með þessum hætti og í raun algjör niðurlæging fyrir íslensk stjórnvöld,“ segir Sema.

 „Ég á varla til orð til að lýsa vonbrigðunum og reiðinni vegna þess að við erum að horfa upp á aðstæður og erum hér í aðstæðum, sem maður gat ekki ímyndað sér að vera í. Þetta er til marks um algjört áhuga- og getuleysi íslenskra stjórnvalda í málefnum Palestínufólks.

Óboðlegar aðstæður

Undanfarna daga hefur verið mótmælt hérlendis vegna handtöku og brottvísunar palestínskrar fjölskyldu til Grikklands. Sema segir með ólíkindum að þetta sé gert á sama tíma og þjóðarmorð er framið í Palestínu.

„Íslensk stjórnvöld eru ítrekað að brottvísa Palestínufólki frá Íslandi og aftur á flótta. Ég veit það eru líka einstaklingar frá Palestínu, sem eru í hópi þeirra sem eru í dag flóttafólk án hvers konar þjónustu og stuðnings og búa í raun við heimilisleysi á Íslandi,“ segir Sema.

„Þetta eru aðstæður sem eru ekki boðlegar fyrir nokkurn á flótta, eða aðra. Það er siðferðislega rangt og algjörlega fráleitt að framkoma íslenskra stjórnvalda sé með þessum hætti við fólk sem er nýbúið að flýja undan þjóðarmorði eða á fjölskyldu sem er í hættu á að láta lífið vegna yfirstandandi þjóðarmorðs.“