Sindri segist hafa fram­leitt lé­legar byssur viljandi

Sindri Snær gaf skýrslu fyrir dómi í morgun hvað varðar þann hluta hryðjuverkamálsins svokallaða sem snýr að vopnalagabrotum hans. Hann sætir ákæru fyrir vopnalagabrot í níu liðum, meðal annars fyrir að framleiða skotvopn, íhluti í skotvopn og skotfæri. 

Hann játaði sök hvað varðaði framleiðslu á þrívíddarprentuðum skotvopnum en neitaði að mestu öðru leyti.

„Ég framleiði þetta viljandi þannig að þetta myndi klikka eftir tíu eða tuttugu skot. Ég var að selja þetta og ég kærði mig ekki um það að fólk hefði vel smíðuð og virk skotvopn. Ég gerði þetta í auðgunarskyni.“

Þó segist hann aldrei hafa fengið greitt í peningum. Hann hafi alltaf fengið greitt í fíkniefnum en hann viti ekki nákvæmlega hversu mikils virði fíkniefnin voru. Viðmiðunarverð hafi verið hálf milljón króna fyrir hvert skotvopn.

Þá segir hann að samákærði hans Ísidór Nathansson hafi haft litla aðkomu að framleiðslu og sölu skotvopnanna. Hann hafi aðeins framleitt einhverja íhluti í skotvopn.

Forvitni hafi leitt þá til að framleiða „swift link“

Sindri er meðal annars ákærður fyrir framleiðslu á svokölluðum swift link, hröðunarstykki fyrir riffil. Hann segir að hann hafi ekki framleitt stykkið en Ísidór hafi gert það að hans beiðni.

Það hafi verið fróðleiksfýsn sem fékk þá til þess að framleiða og reyna að koma stykkinu fyrir í AK-47 riffli. Það hafi aldrei gengið upp.

Faðir hans hafi átt rifflana

Sindri er einnig ákærður fyrir vopnalagabrot fyrir að hafa haft þrjá riffla af gerðunum AR-15, AK-47 og CZ-557, í fórum sínum án heimildar. Vopnin fundust við leit inni í svefnherbergi Sindra Snæs.

Hann segir föður sinn hafa átt vopnin en hann hafi búið heima hjá honum þar sem hann hafi verið á milli húsnæða. Byssuskápur með rifflunum hafi fylgt með búslóðinni og verið komið fyrir inni í herberginu hans vegna plássleysis. Herbergi föður hans hafi verið lítið og þeir hafi ekki viljað geyma skápinn inni í stofu, í eldhúsinu eða á baðherberginu.

Hann hafi aldrei handleikið vopnin án þess að faðir hans væri viðstaddur. Faðirinn hafi til að mynda verið viðstaddur þegar þeir Ísidór boruðu í hlaup AK-47 riffilsins og reynt að koma „swiftlink“ fyrir í honum.

Faðirinn sagði Sindra eiga vopnin

Karl Ingi Vilbergsson, sem sækir málið fyrir ákæruvaldið, segir að Birgir Ragnar Baldursson, faðir Sindra Snæs, hafi sagt í skýrslutöku að Sindri hefði átt hugmyndina að því að kaupa rifflana. Hann hafi verið sáttur með að eiga haglabyssu og boltariffilinn. Sindri hafi átt hugmyndina að því að kaupa AK-47 og AR-15. Sindri eigi þessi tvö vopn. Hann hafi fengið sér skotvopnaleyfi til þess að Sindri gæti eignast þessi skotvopn. Sindri Snær segir ekkert af þessu rétt.

Sindri Snær segir samantekt ákæruvaldsins á skýrslutöku yfir föður hans vera „í ruglinu“ og leggur fyrir Karl Inga sækjanda að fara betur yfir skýrsluna.

Verjendur benda á að skýrsla sem Karl Ingi vísar til sé samantektarskýrsla, ekki beint endurrit. „Þetta er skýrsla sem lögreglumaður skrifar upp. Ekki áreiðanlegustu heimildirnar,“ segir Sveinn Andri.

Aðalmeðferð heldur áfram í dag og næstu daga. Eftir hádegi gefur Sindri Snær skýrslu hvað varðar þann hluta ákærunnar sem snýr að ætlaðri skipulagningu hryðjuverka.