Vill að al­þjóð­leg rann­sókn fari fram á vélinni sem hrapaði

„Það er nauðsynlegt að fá fram allar staðreyndir, eins mikið og hægt er, og taka það til greina að vélin hrapaði á rússnesku yfirráðasvæði – sem er ekki undi okkar stjórn,“ sagði Selenskíj í ávarpi sínu í gærkvöldi um flugvélina sem hrapaði.

Greint var frá því í gær að flutningaflugvél rússneska hersins hefði hrapað til jarðar í Belgorod-héraði og sprungið. Vélin hrapaði nærri íbúðabyggð.

Varnarmálaráðuneyti Rússlands sagði Il-76 flugvélina hafa borið 65 úkraínska stríðsfanga sem til stóð að skipta við Úkraínumenn, auk áhafnar, alls 74 manns.

Á erlendum miðlum segir að ekki hafi tekist að staðfesta með neinum hætti hverjir eða hvað hafi verið um borð í vélinni en misvísandi skilaboð hafa komið frá Rússlandi og Úkraínu.

Á vef BBC segir að Úkraínuher segi í tilkynningu ekki hafa í aðdraganda flugsins fengið neinar tilkynningar um að tryggja flughelgi eins og áður þegar slík skipti fóru fram. Á BBC segir að með tilkynningu sinni hafi úkraínski herinn verið að gefa í skyn að þeir hefðu skotið vélina niður og hefðu ekki haft upplýsngar um það hverjir voru um borð. Með því að tilkynna þeim ekki hverjir væru um borð væru Rússar að stefna lífi fanganna vísvitandi í hættu. 

Átta þúsund í haldi í Rússlandi

Þónokkur fangaskipti hafa farið fram á milli Rússlands og Úkraínu frá því að stríðið hófst í febrúar árið 2022. Þau stærstu fóru fram snemma í þessum mánuði þegar 248 föngum var sleppt úr haldi Úkraínumanna og Rússar slepptu 230 föngum. Samkvæmt frétt BBC eru enn átta þúsund Úkraínumenn í haldi í Rússlandi og tugir þúsunda týndir.

Stríðið er nú að nálgast sitt þriðja ár og hafa árásir Rússa á Úkraínu stigmagnast síðustu vikur. 18 voru drepin á þriðjudag og 130 særð í loftárásum á úkraínskar borgir.

Varnarmálaráðherra Úkraínu, Rustem Umerov, hefur varað við því að Úkraínumenn séu við það að klára skotfæri sín. Rússar hafa síðustu tvo mánuði skotið 600 flugskeytum á Úkraínu og notað um þúsund dróna í árásum sínum. Úkraínumenn nota einnig dróna mikið í árásum sínum en drónaárás þeirra varð þess valdandi síðustu helgi að stór afhendingarstaður gass nærri Sankti Pétursborg sprakk í loft upp.