Þema kvöldsins var níundi áratugurinn og keppendur fluttu af því tilefni 80s-lög sem endurspegluðu áratuginn. Eins og fyrsta kvöldið voru örlög keppenda í höndum áhorfenda en ekki dómara og munu úrslit næstu þátta Idolsins ráðast í símakosningu.
Í síðasta þætti var met slegið í símakosningunni en það met var slegið í kvöld og hafa aldrei áður borist jafn mörg atkvæði í sögu keppninnar.
Höskuldarviðvörun - ef þú hefur ekki horft á Idol þátt gærkvöldsins - ekki lesa lengra.
Þegar niðurstaða úr símakosningunni var kynnt kom í ljós að það var söngkonan Birgitta sem þurfti að taka pokann sinn. Hún flutti ódauðlega hittarann Holding Out For a Hero sem Bonnie Tyler samdi fyrir myndina Footloose.
Birgitta fékk mjög jákvæða umsögn frá ölllum dómurunum sem voru ánægðir að sjá hana demba sér í rokkið og sagði Bríet: „Þú varst í kvöld að sýna okkur nýja hlið sem er mjög mikilvægt en ég fann að þér fannst það smá óþægilegt, það var einhver smá dofi yfir þér. En það er af því þú ert að stækka og þegar maður er að stækka þarf maður að prófa eitthvað nýtt.“
„Þú ert geggjuð rokkstjarna allt í einu. Algjör hetja og mjög hressandi að heyra þig í þessum heimi,“ sagði Daníel Ágúst sem skynjaði þó smá óöryggi í byrjun.
„Þetta var svakalegur flutningur og þú kemur mér alltaf meira og meira á óvart,“ sagði Herra Hnetusmjör og bætti við „Því lengra sem þú komst inn í lagið og þarna undir lokin var þetta bara galið. Takk fyrir.“
Nú eru sex keppendur eftir í Idolinu þau Elísabet, Stefán Óli, Ólafur Jóhann, Jóna Margrét, Björgvin og Anna Fanney.
Næsta úrslitakvöld fer fram næstkomandi föstudagskvöld, aftur í beinni útsendingu frá Fossaleyni.
