Meira en 90 prósent barnaníðsefnis tekið upp af börnunum sjálfum

Þetta kemur fram í nýrri samantekt frá The Internet Watch Foundation, IWF, sem hefur það verkefni að leita uppi barnaníðsefni og fjarlægja það af netinu. Samkvæmt umfjöllun Guardian fannst barnaníðsefni af börnum yngri en tíu ára á meira en hundrað þúsund vefsíðum í fyrra. Það er 66 prósent aukning frá árinu á undan. 

Í heildina fannst barnaníðsefni á 275.655 vefsíðum, sem er 8 prósent aukning frá 2022. Framkvæmdastjóri IWF segir þessa aukningu ekki endilega merki um að meira magn af svona efni sé framleitt heldur að eftirlitið sé orðið strangara. 

„Það þýðir að við erum að finna meira barnaníðsefni en ég held að enginn geti nokkurn tíma sagt að það sé got tað finna mikið magn af barnaníðsefni,“ segir Susie Hargreaves framkvæmdastjóri IWF í samtali við Guardian. 

Samkvæmt upplýsingum frá IWF eru börnin, sem taka upp barnaníðsefnið sjálf tilneydd, allt niður í þriggja ára gömul. Að sögn Hargreaves er efni tekið upp af börnunum sjálfum nokkuð nýtt af nálinni. Það hafoi til að mynda varla verið þekkt fyrir áratug síðan. 

„Þetta eru börn sem eru heima hjá sér í flestum tilvikum og hafa verið blekkt, tilneydd eða hvött til að taka þátt í kynferðislegri athöfn sem er svo tekin upp og deilt inn á barnaníðsvefsíður,“ segir Hargreaves.