Loksins raf­magns sport­jeppi frá Porsche

Á tíu ára afmælinu mun Porsche fagna þeim áfanga með nýjum, alrafmögnuðum Macan sem setur ný viðmið á markaði sportlegra rafjeppa. Margir fögnuðu þegar Porsche kynnti Taycan, hreinræktaðan rafmagns sport bíl, sem fyrsta rafmagnsbíl sinn, en þó er ljóst að mun fleiri hafa beðið eftir fyrsta rafmagns sportjeppanum enda eru Íslendingar fyrir löngu síðan orðnir einhver mesta jeppaþjóð heims.

Rafmagnaður Macan mun vera kynntur hér á landi með vorinu og kosta frá 13,5 milljónum hérlendis miðað við núverandi skattaumhverfi. Hjá Porsche var lagt upp með að nýr Macan EV yrði sportlegasti rafjeppinn í þessum flokki en þar byggir hann á reynslu Porsche sem hefur í yfir 75 ár framleitt marga af merkilegustu sportbílum sögunnar.

Flestir kannast eflaust við Porsche Taycan en hann var sannkölluð bylting á rafbílamarkaðinum þar sem hann kynnti til sögunar 800v rafkerfi og einstaklega hraðvirka hleðslugetu sem skilaði jafnvel 100 km drægni á fimm mínútum. Þannig sannaði Porsche að það væri ekkert mál að ferðast langar vegalengdir á rafbílum en sannaði jafnframt að ekki er nauðsynlegt að vera með allt of stórar og þungar rafhlöður, ef að hleðslugetan er nægilega góð. Porsche hefur þegar sett yfir 100.000 Taycan rafbíla á markað en miklar væntingar eru til hins nýja rafbíls sem koma mun sterkur inn á markað þar sem mikil samkeppni ríkir.

En hvað er nýtt í Porsche Macan EV? Um stærri bíl er að ræða en í fyrri kynslóðum með 2.900 mm hjólhaf. Undirvagninn verður með nýrri 100 kWst rafhlöðu sem er skipt í 12 hólf sem hægt er að skipta út hverju fyrir sig. Hlutföll nikkels, kóbalts og mangan eru 8:1:1 sem ætti að tryggja allt að 30% meiri hleðslugetu en í Porsche Taycan. Uppbygging rafhlöðunnar er byltingarkennd en til að mynda er hún tvískipt þannig að hægt verður að hlaða hana með fullri getu hvort sem að hleðslan er 400 eða 800 volt. Er það gert með því að skipta 800 volta rafhlöðunni í tvennt sem hægt er að hlaða á 150 kW samhliða, en á 800 voltum er hægt að hlaða á allt að 270 kW. Öflugri útgáfa bílsins verður 640 hestöfl og með 1.000 Nm togi gegnum tvo rafmótora. Áætluð drægni er upp í um 621 km en nánari upplýsingar um það fást þegar bíllinn verður endanlega kynntur í janúar. Í fyrsta skiptið verður notast við sílikon-karbíð í straumbreytirinn fyrir afturdrifið sem á að auka viðbragðsgetu bílsins en hann verður aðeins 3,3 sekúndur í hundraðið í aflmestu útgáfu.

Fjöðrunin verður tvöföld klafafjöðrun að framan og fjölliða að aftan með möguleika á PASM uppfærslu og loftpúðafjöðrun. Innandyra verða tveir 10,9 skjáir fyrir afþreyingu en bílstjóri getur notið 12,6 tommu skjá. Einnig verður hægt að panta bílinn með stórum framrúðuskjá sem notast við „artifical reality“ sem er sambærilegur við að horfa á 87 tommu skjá á veginum fyrir framan ökumanninn. Farþegi í framsæti getur einnig fengið 10.9 tommu skjá fyrir framan sig þar sem hægt er að horfa á afþreyingarefni frá streymisveitum. Bíllinn kemur með nýju talkerfi sem á auðveldara með að skilja skipanir auk þess að vera hraðvirkara. Android Auto og Apple CarPlay verður staðalbúnaður og verður landakortum í leiðsögukerfinu varpað upp á skjáinn fyrir framan ökumann.

Bílabúð Benna, umboðsaðili Porsche á Íslandi, býður viðskiptavinum sínum upp á að forpanta bíllinn en áætlað er að bíllinn verði kynntur hérlendis með vorinu og að fyrstu eintök hans verði afhent snemma í sumar en ljóst er að langir biðlistar muni myndast þar sem margir hafi beðið eftir þessari blöndu Porsche rafmagns sportjeppa.