Enginn friður fyrr en mark­miðum Pútíns er náð

Forsetinn, sem stýrt hefur Rússlandi í 24 ár og ætlar að gera það í minnst sex ár til viðbótar, sagði að markmið hans í Úkraínu væru það sem hann kallar afnasistavæðing og afhervæðing Úkraínu. Markmiðið væri einnig að tryggja hlutlausa Úkraínu.

Pútín og málpípur hans hafa lengi haldið því fram að Úkraínu sé stjórnað af nasistum, sem er rangt, og hefur hann sagt að Rússar séu í raun í stríði við Vesturlönd, sem reyni að skipta Rússlandi upp.

Sjá einnig: Segir barist fyrir til­vist Rúss­lands

Rússar hafa innlimað fjögur héruð Úkraínu ólöglega, til viðbótar við Krímskaga sem Rússar hertóku árið 2014, þó þeir stjórni engu þeirra að fullu. Þá hefur Pútín ítrekað haldið því fram að Úkraína sé ekki raunverulegt ríki og Rússar eigi rétt á því að stjórna því. Í því samhengi hefur Pútín einnig líkt sér við Pétur mikla, keisara Rússlands á árum áður.

Þegar Pútín tjáði sig um innrásina í Úkraínu gerði hann ljóst að hann teldi bakhjarla Úkraínu vera að missa móðinn og að hernaðaraðstoðin myndi hætta.

Sjá einnig: Ó­reiða í Washington og til­hlökkun í Moskvu

„Þeir fá allt ókeypis,“ sagði Pútín um hergögnin sem Úkraínumenn hafa fengið frá bakhjörlum sínum. Þeir fá mikið gefins en kaupa einnig mikið magn hergagna. Pútín bætti við að hann sæi ummerki þessa að hernaðaraðstoðin væri byrjuð að þorna upp, ef svo má að orði komast.

Hér að neðan má meðal annars sjá umræðu í 60 mínútum í Rússlandi frá því fyrr í vikunni um það hvernig Rússar eigi að refsa Úkraínumönnum fyrir mótspyrnuna, þegar stríðið er unnið. Nokkrir af viðmælendum í rússneskum sjónvarpsþáttum og viðtölum á undanförnum vikum og mánuðum hafa talað um að „afnasistavæðing“ feli í sér að drepa fólk. Þeir tala jafnvel um það að þurfa að drepa minnst tvær milljónir Úkraínumanna til að brjóta baráttuvilja þjóðarinnar á bak aftur.

Gaf til kynna mikið mannfall

Pútín gaf einnig upp upplýsingar um innrásina í Úkraínu sem hafa vakið mikla athygli. Það gerði hann þegar hann var að segja að engin þörf væri á annarri herkvaðningu þar sem um 617 þúsund rússneskir hermenn væru að berjast í Úkraínu.

Pútín sagði að 486 þúsund menn hefðu gengið til liðs við rússneska herinn frá því innrásin í Úkraínu hófst. Þar að auki hefðu um 244 þúsund verið kvaddir í herinn.

Hernaðargreinandinn Yan Mateev, sem starfaði hjá andspillingarstofnuninni sem Alexei Navalní stofnaði í Rússlandi og hafa verið skilgreind sem öfgasamtök, segir þessi ummæli benda til þess að um 363 þúsund rússneskir hermenn hefðu særst eða fallið í Úkraínu.

Ef 244 þúsund hefðu verið kvaddir í herinn og 486 þúsund hefðu gengið sjálfviljugir til liðs við herinn, eftir að innrásin hófst, sem um 250 þúsund hermenn tóku þátt í, og að nú væru 617 þúsund rússneskir hermenn í Úkraínu, fæli það í sér að 363 þúsund hermenn hefðu fallið eða særst.

Yfirvöld í Bandaríkjunum opinberuðu í vikunni greinungi leyniþjónusta þar í landi þar sem fram kom að áætlað væri að um 317 þúsund rússneskir hermenn hefðu fallið eða særst í Úkraínu.

Gagnrýnar spurningar rötuðu á skjáinn

Pútín hefur reglulega haldið fundi sem þessa í gegnum árin en gerði það ekki í fyrra. Þessir fundir eru aðallega ætlaðir almenningi í Rússlandi og eiga að sýna hvernig Pútín geti persónulega komið almenningi í Rússlandi til aðstoðar varðandi vandamál þeirra.

Fundunum hefur í gegnum árin verið líkt við það þegar kóngar og keisarar hlýddu á almenning á árum áður. Þeim er iðulega stýrt af mikilli nákvæmni og fólkið sem spyr forsetann spurninga valið fyrir fram.

Að þessu sinni virðast þó nokkrar spurningar hafa ratað í gegnum síuna en á skjám í salnum þar sem fundurinn fór fram mátti sjá margar spurningar sem fólk sendi inn í gegnum netið. Margar þeirra voru mjög gagnrýnar á stöðu Rússlands.

Blaðamaður BBC hefur bent á nokkrar á samfélagsmiðlum í morgun en þeirra á meðal eru spurningar eins og:

„Af hverju er þinn raunveruleiki ekki eins og okkar raunveruleiki?“

„Herra forseti, hvenær verður raunverulega Rússlands eins og það er sýnt í sjónvarpinu?“

„Hæ. Hvenær verður hægt að flytja til þess Rússlands sem þeir segja okkur frá á Stöð 1?“

„Getur þú unnið stríð með „virkri vörn“?“

„Ekki bjóða þig fram í annað kjörtímabil. Rýmdu leiðina fyrir yngra fólk!“

„Þessi spurning verður ekki sýnd! Ég vil vita, hvenær mun forseti okkar sýna hans eigin ríki athygli? Við höfum enga menntun, enga heilbrigðisþjónustu. Hyldýpið er framundan.“