Fær milljarð Banda­ríkja­dala í skaða­bætur vegna hefndar­kláms

Konan sem er frá Texas og gengur undir skammstöfuninni D.L. í dómskjölum höfðaði mál gegn fyrrverandi kærasta sínum, Marques Jamal Jackson, í apríl 2022 fyrir að áreita hana með því að dreifa nektarmyndum af henni á samfélagsmiðlum.

Kviðdómur í Harris-sýslu í Texas komst að þeirri niðurstöðu að konan hefði verið fórnarlamb hefndarkláms og voru henni dæmdir 1,2 milljarður Bandaríkjadala (um 132 milljarðar íslenskra króna) í skaðabætur. Þar af 200 milljónir dala vegna andlegrar angistar og milljarður í refsibætur.

Sendi nektarmyndir á vini og fjölskyldu

Samkvæmt málsókninni hafði Jackson dreift nektarmyndum af fyrrverandi kærustu sinni, sem hann fékk á meðan þau voru saman, á samfélagsmiðlum og klámsíðum til að „gera hana vandræðalega, áreita, kvelja, niðurlægja og smána opinberlega“.

Í málssókninni er Jackson einnig sakaður um að hlera öryggiskerfi fyrrverandi tengdamóður sinnar til að njósna um D.L. eftir að þau hættu saman. 

Hann bjó sömuleiðis til falska netaðganga og sendi hlekki á vini hennar og fjölskyldu á síður þar sem búið var að hlaða upp nektarmyndum af henni. Þá var hann einnig sakaður um að taka pening af bankareikning hennar til að greiða leigu sína og aðra reikninga.

Vildi eyðileggja líf hennar

Jackson og D.L. hófu samband sitt 2016 og fluttu saman til Chicago þar sem honum bauðst starf. Samkvæmt dómsskjölum fannst D.L. eðlilegt að deila persónulegum myndum af sér með honum á meðan á sambandinu stóð. 

Hins vegar hafi hann haldið í myndirnar eftir að þau hættu saman í október 2021, þvert gegn hennar vilja. Skömmu eftir að D.L. flutti aftur til Texas byrjaði Jackson að deila nektarmyndum af henni. Þá hlóð hann myndum af henni upp á samfélagsmiðla og merkti vinnuveitendur hennar og líkamsrækt.

Í dómsskjölum er að finna lokaskilaboð Jackson til D.L. þar sem segir „Þú munt eyða restinni af ævi þinni í að reyna og mistakast að þurrka þig af netinu. Allir sem þú hittir munu heyra söguna og leita að myndunum.“

Táknrænn sigur fyrir fórnarlömb hefndarkláms

Bradford Gilde, lögfræðingur D.L., sagði að skaðabæturnar væru táknrænn sigur fyrir fórnarlömb hefndarkláms sem væri blanda af andlegu, kynferðislegu og heimilisofbeldi. Þó það væri ólíklegt að peningurinn fengist hefði D.L. fengið mannorð sitt aftur.

Málið er nýjasta hefndarklámsmálið í Bandaríkjunum þar sem fórnarlömbum eru dæmdar gríðarháar skaðabætur þó skaðabætur D.L. séu sér á parti.

Árið 2021 var konu frá Maryland dæmdar 500 þúsund dala skaðabætur eftir að maður birti nektarmyndir af henni á netinu. Þá hlaut kona frá Kaliforníu 6,45 milljónir Bandaríkjadala árið 2018 eftir að fyrrverandi kærasti hennar deildi nektarmyndum af henni.

Öll ríki Bandaríkjanna nema Massachusetts og Suður-Karólína hafa bannað hefndarklám. Löggjafinn í Massachusetts hefur kynnt aðgerðir sem banna hefndarklám en lögin hafa ekki enn verið samþykkt af löggjafarþingi ríkisins.