Suðurnesjalína 1 í jörð með lang­þráðu sam­komu­lagi

Með samkomulaginu er loks útlit fyrir að framkvæmdir við línuna geti hafist en það felur í sér að hin eldri Suðurnesjalína 1 verði lögð í jörðu innan sveitarfélagamarka Voga. Vonast er til að framkvæmdir við Suðurnesjalínu 2 geti hafist á næsta ári og þeim verði lokið um næstu áramót.

„Þetta er býsna stór dagur, hér liggur nú fyrir samkomulag sem tryggir að framkvæmd við Suðurnesjalínu 2 getur hafðist vonandi innan skamms. Samkomulagið er afrakstur góðrar samvinnu og samtals sem hefur átt sér stað milli bæjaryfirvalda í Vogum og starfsmanna Landsnets á undanförnum vikum þar sem leitast var við að finna lausn á þessu stóra máli,“ sagði Gunnar Axel Axelsson, bæjarstjóri Voga við undirritunina.

Með samkomulaginu verður Suðurnesjalína 1 að hluta til lögð í jörðu strax eftir að framkvæmdum á Suðurnesjalínu 2 er lokið. Til framtíðar litið er svo stefnt að því að línan verði lögð sem jarðstrengur innan sveitarfélagamarka Voga.

Framkvæmdir hefjist á næsta ári

Guðmundur Ingi Ásmundsson, forstjóri Landsnets sagði þetta stóran dag fyrir fyrirtækið og stórt mál að hafa gengið frá þessu máli. Jafnhliða framkvæmdum á Suðurnesjalínu 2 verður hafist handa við að taka niður Suðurnesjalínu 1 að hluta til og leggja jarðstreng innan Voga á fimm kílómetra kafla sem verður fyrsti áfanginn í því að tengja sveitarfélagið betur við meginraforkukerfið. 

„Það er afskaplega mikilvægt fyrir okkur í þessu vandasama máli að hafa haldið góðu samtali allan tímann og við erum sérstaklega ánægð með að hafa fundið lausn sem allir geta vel við unað. Auðvitað er þetta stór dagur fyrir svæðið hérna að tryggja öryggið og komast í þessar mikilvægu framkvæmdir. Hvað okkur varðar er ekki síður mikilvægt að við sáum þarna leið sem hjálpar Sveitarfélaginu Vogum að byggja upp atvinnustarfsemi ef áhugi verður til, þannig að þetta er góður dagur,“ sagði Guðmundur við undirritunina í dag. 

Löng bið eftir Suðurnesjalínu 2

Um er að ræða langþráða sátt um lagningu Suðurnesjalínu 2, annarrar flutningsleiðar raforku á Suðurnes, en viðræður um verkefnið hafa staðið yfir í hátt í tvo áratugi. Hefur það einkum strandað á afstöðu Voga sem hefur farið fram á að nýjar háspennulínur sem lagðar verði í gegnum sveitarfélagið fari í jörðu og mætt andstöðu Landsnets. 

Önnur sveitar­fé­lög sem koma að málinu, þar er Reykja­nes­bær, Grinda­vík og Hafnar­fjörður hafa áður veitt Lands­neti fram­kvæmda­leyfi fyrir lagningu Suður­ne­sja­línu 2. Línunni er ætlað að tryggja betur afhendingaröryggi raforku á Reykjanesi en Suðurnesjalína 1 er í dag eina raforkutengingin inn á Suðurnes. Hefur þetta leitt af sér víðtækt rafmagnsleysi þegar bilun kemur upp í línunni eða tengivirkjum. 

Skipulagsnefnd og bæjarstjórn Voga hafa samþykkt að veita framkvæmdaleyfi fyrir Suðurnesjalínu 2 á þeim forsendum sem fram koma í samkomulaginu.

Fréttin hefur verið uppfærð.