Sláandi að menn telji enn söluna hafa verið far­sæla

Yfirmenn Íslandsbanka hafa setið undir mikilli gagnrýni allt frá því sátt bankans við Fjármálaeftirlitið var gerð opinber á mánudag. Birna Einarsdóttir tilkynnti þá ákvörðun í nótt að hún væri hætt sem bankastjóri. Jón Guðni Ómarsson hefur nú tekið við hennar starfi.

Formaður stjórnar segir ráðninguna aðeins fyrstu viðbrögð og að það sé ábyrgð bankans að vinna sér aftur inn traust almennings. Boðað verður til hluthafafundar í lok júlí vegna málsins.

Á löngum fundi efnahags- og viðskiptanefndar var það ítarlega rætt hvort að gerð verði krafa um stjórnarkjör á hluthafafundinum en fulltrúar Bankasýslu gátu ekki svarað því á fundinum hvort gerði verði krafa um það.

„Á þeim fundi höfum við óskað eftir því eða krafist þess að gerð verði grein fyrir þessum atvikum sem leiða til þessarar sáttar og það skiptir gríðarlega miklu máli að fá skýringar á því og síðan að sjálfsögðu hvernig menn ætla að tryggja áframhaldandi traust til bankans,“ sagði Lárus Blöndal stjórnarformaður Bankasýslunnar að loknum fundi.

Forstjóri Bankasýslunnar sagði hana hafa staðið við sitt hlutverk. Það hafi legið skýrt fyrir hvert það væri og hvert verklagið væri. Því hefði ekki verið fylgt í bankanum og að það væru vonbrigði. Salan sjálf hefði gengið vel og niðurstaðan góð, fjárhagslega. Hann fullyrti á fundinum að salan væri ein sú farsælasta í Evrópu og íslandi og að hann stæði enn við það.

Þessari fullyrðingu áttu margir þingmenn erfitt með að kyngja og spurðu til dæmis hvort að fjárhagsleg niðurstaða væri eini mælikvarðinn á það hvort að salan hefði verið farsæl.

Arndís Anna Kristínardóttir sagði eftir fundinn það koma á óvart að Bankasýslan hafi ekki svarað öllum hennar spurningum og taldi að það sem stæði upp úr á fundinum væri hversu mörgu spurningum væri í raun enn ósvarað.

„Það sem mér finnst kannski mest sláandi sem kom fram á þessum fundi og hefur líka komið fram í máli ráðherra er að fólk líti svo á að þetta hafi verið farsæl sala þrátt fyrir þetta allt,“ segir Arndís og að sáttin þýði að verklagið sé að virka.

Hún segir það valda sér áhyggjum ef fólk líti svo á og að það sé algerlega óásættanlegt viðhorf. Hún segir kröfuna um rannsóknarnefnd harðari eftir því sem á líður.

Hún segir það hafa verið viðbúið að bankastjóri myndi hætta en að það sé ekki ásættanlegur endir á þessu máli. Það þurfi fleiri að fara.

Fleiri verði að fjúka

Það tók Ásthildur Lóa Þórsdóttir, þingmaður Flokks fólksins undir, við lok fundar. Hana furðar það að bankasýslan ætli að firra sig allri ábyrgð.

„Það sem vekur mér furðu er hversu mikið traust var lagt á það að bankinn myndi gera hlutina á réttan hátt og fara eftir regluverki því þeir hafa ekki verið þekktir fyrir það í gegnum tíðina,“ sagði Ásthildur Lóa sem tók undir þá kröfu að gerð verði rannsóknarskýrsla.

„En svo finnst mér mikilvægt að tryggja að þetta bitni ekki allt á neytendum. Það eru alltaf neytendur sem borga brúsann. Fjármálakerfið klúðrar og neytendur látnir bera kostnaðinn,“ sagði Ásthildur Lóa og að það hafi verið vonbrigði að heyra að Fjármálaeftirlitið gæti ekki tryggt að það gerðist ekki.

Verði að fá öll gögn upp á yfirborðið

Kristrún Frostadóttir, formaður og þingkona Samfylkingarinnar, sagði svörin að einhverju leyti hafa verið upplýsandi, eins og það sem hafi komið fram á fundi með fulltrúum Fjármálaeftirlitsins um að setning í sáttinni um að villt hafi verið um fyrir Bankasýslunni byggi á því að engar upplýsingar bárust á milli bankans og Bankasýslunnar eftir að fjárfestar voru valdir. Hún sagði það áhugaverða framsetningu að ekki hafi verið talin ástæða til að kanna þessa fjárfesta betur.

Hún tekur undir kröfu um rannsóknarnefnd og áréttar að það sé ekki einungis til að „hanka“ fjármálaráðherra.

„Þetta snýst um að fá öll gögn upp á yfirborðið. Við erum núna smám saman í smáum skömmtum að fá upplýsingar um það sem gerðist. Við eigum enn eftir að fá fleiri skýrslur um söluráðgjafa og það gengur ekki að stakir þingmenn og þingnefndir séu í rannsóknarhlutverki í marga, marga mánuði. Við þurfum bara heildarmyndina og þess vegna þurfum við rannsóknarnefnd.“