Ferðamenn eyða langmestu í gistingu

Þetta kemur fram í hagsjá Landsbanksans þar sem kortavelta erlendra ferðamanna, á fyrstu fimm mánuðum ársins, er skoðuð. Kortveltan hefur aldrei verið meiri í þremur helstu gjaldaliðum, það er gistiþjóunustu, veitingaþjónustu og verslun. 

Kortaveltan á fyrstu fimm mánuðum ársins nam 108 milljörðum króna en var 73 milljarðar á sama tíma í fyrra. Tekið er fram að fyrstu mánuðir síðasta árs lituðust af faraldrinum. Árið 2019 var kortaveltan 104 milljarðar króna.

Eins og áður segir hefur kortaveltan aukist langmest í gistiþjónustu og nemur á fyrstu mánuðum ársins 29 milljörðum króna. Í fyrra nam kortaveltan í gistiþjónustu 14 milljörðum en 21 milljarður var veltan árið 2019.

Hér að neðan má sjá kortaveltu eftir helstu útgjaldaliðum á föstu verðlagi milli ára.

Verslun er næststærsti útgjaldaliður kortaveltu og greiðslur í verslunum námu um 17 milljörðum króna á fyrstu fimm mánuðum ársins. Hún nær til dæmis yfir verslun í stórmörkuðum, fataverslun, gjafa- og minjagripaverslun og tollfrjálsa verslun. Veitingaþjónusta kemur þar á eftir þar sem kortavelta nam um 16 mö.kr á fyrstu fimm mánuðum ársins. 

„Síðustu ár hafa úttektir á reiðufé dregist saman jafn og þétt,“ segir í hagsjánni.

Þá kemur einnig fram að meðalkortavelta á hvern ferðamann á föstu gengi sé ennþá meiri en fyrir faraldur, sem þýðir að hver ferðamaður eyðir að meðaltali meiri pening í sínum gjaldmiðli en fyrir faraldur.