Mest hissa á að húsið hafi aldrei verið notað í bíó­mynd

„Þetta er sann­kallað retró hús,“ segir Daníel Rúnar Elías­son, fast­eigna­sali hjá Há­kot í sam­tali við Vísi. Húsið var byggt árið 1968 og segir Daníel sömu eig­endur hafa verið að húsinu allar götur síðan, þar til nú. Inn­réttingarnar minna hressi­lega á áttunda ára­tuginn, enda upp settar þá.

„Þær eru gríðar­lega vel farnar og það sést lítið sem ekkert á þeim og ekki heldur teppum á gólfinu,“ segir Daníel. Hann segir eig­endurna fyrir nokkrum árum hafa ætlað að minnka við sig en hætt við, enda húsið þeim kær­komið.

„Þá fékk ég ein­mitt mikið af fyrir­spurnum frá fólki um inn­búið. Ein­hverjir sem voru á­huga­samir um að kaupa ljósin og hitt og þetta. Þetta var svona eins og góði hirðirinn í raun­tíma,“ segir Daníel í gríni.

Húsið er á einni hæð og fimm herbergi, eins og fram kemur á fasteignavef Vísis. Það er 139,6 fer­metrar að stærð, auk þess sem 41,6 fer­metra bíl­skúr fylgir húsinu. Saman­lagt er eignin því 181,2 fer­metrar og er upp­sett verð 87,9 milljónir króna.

Daníel segir mikinn á­huga hafa verið á húsinu og vel mætt á opið hús í gær. „Fólk var mest hissa á því að þetta hefði aldrei verið notað í bíó­mynd,“ segir Daníel hress í bragði.