„Þetta er mesti skaði allra þjóðfélaga“

„Við sem samfélag þurfum að geta talað um þessa hluti og við þurfum að horfast í augu við að þetta er ekki gífuryrði eða einhvers konar bull,“ segir Bubbi í viðtali í Reykjavík síðdegis á Bylgjunni í dag. „Þið verðið að athuga það að þessir ellefu einstaklingar, þeir eru ekki einu sinni helmingurinn af þeirri tölu sem dó á seinasta ári úr of stórum skömmtum.“

Bubbi segir að elsti einstaklingurinn sem hann er búinn að syngja yfir sé 46 ára ogað sá yngsti hafi verið 21 árs gamall. Hann segir að þetta séu jafnvel einstaklingar sem hafi ekki verið í langri neyslu.

„Sumir hverjir hafa bara í rauninni byrjað einhvers staðar þarna að ánetjast þessum ofboðslega sterku verkjalyfjum og deyja. Það er nú ekki flóknara en það.“

Ástandið sé lagað með samkennd, kærleika og manngæsku

Bubbi kallar eftir viðbrögðum frá samfélaginu og yfirvöldum hér á landi. Það þurfi að íhuga hvað sé hægt að gera til að bæta ástandið. „Það þýðir ekki og það lagar ekkert að dæma fárveika einstaklinga í fangelsi fyrir það að þeir séu að nota fíkniefni eða lyf til þess að komast í vímu,“ segir hann.

„Ég held að við þurfum að fara að skoða líka hvernig við umgöngumst þessa einstaklinga, refsigleði bjargar engum. Við erum með ráðherra sem telja að ef þú ert nógu grimmur og svipan þín er með nógu mörgum göddum þá getum við lagað eitthvað ástand. Það er bara fjarri því, við lögum ekkert nema með samkennd, kærleika, manngæsku og að viðurkenna að ástandið er eins og það er.“

Þá segir Bubbi að það megi ekki gleymast að á bakvið hvern einstakling sem deyr sé fjölskylda í kringum þá. Fjölskyldan muni bera þetta alla ævi og að þetta muni lita líf þeirra.

„Þetta er svo margfaldur skaði fyrir utan þann skaða að missa ungt fólk sem tekur ekki þátt í þjóðfélaginu og nær ekki að verða það sem það hefði getað orðið. Tapið okkar er rosalegt.“

Þörf sé á samstilltu átaki

Aðspurður um hvað sé hægt að gera í þessu segir Bubbi að til að byrja með þurfi að horfast í augu við vandamálið og viðurkenna að það sé til staðar.

„Fyrsta skrefið er að viðurkenna að það er faraldur í gangi með þessa tegund af efnum sem eru til dæmis að drepa fólk í hrönnum í Bandaríkjunum, við erum að tala um þúsundir ofan á þúsundir og úti um allan heim. Við þurfum að byrja á að viðurkenna það, viðurkenna að þetta er staðan og hún er svona.“

Bubbi vill svo að næsta skref sé ekki að setja málið í stýrihóp heldur þurfi að fara beint í aðgerðir. Þörf sé á forvörnum og samstillu átaki. 

„Ef við gerum þetta samstillt eins og oft hefur verið gert í þessu þjóðfélagi þá held ég að við gætum bæði spornað við en aðalmálið sem mér finnst skipta mestu máli er þetta: Við verðum að fara út úr rammanum, út úr þessum ramma sem við höfum verið í gagnvart skaðaneyslu og við förum að hætta að einblína á þetta sem einhvers konar vandamál sem kemur okkur ekki við.“

Þurfi að hugsa málið upp á nýtt

Í færslunni sem Bubbi birti á Facebook-síðu sinni sagði hann að það ríkti algjör þögn hjá yfirvöldum vegna þessa. „Ég vil heldur ekki dæma pólitíkusana sem einhverja asna eða hálvita eða annað. Ég held bara að þeir verði sjálfir að taka sig taki og hugsa málið upp á nýtt,“ segir hann í viðtalinu í dag.

„Þetta er ekki eitthvað „við“ og svo „hin“ - þetta er mesti skaði allra þjóðfélaga.“

Bubbi segir að það þurfi að horfa öðruvísi á þetta og þar sé stjórnmálafólk engin undantekning. „Pólitíkusar verða að taka sig taki og gjöra svo vel að horfast í augu við að þetta er að drepa fleiri ungmenni en nokkuð annað í þessu þjóðfélagi,“ segir hann.

Sem dæmi nefnir Bubbi að ef þessi fjöldi væri að láta lífið á hverju ári í nátturuhamförum eins og snjóflóðum, jarðskjálftum eða eldgosi þá væri búið að grípa til aðgerða.