Fastan og fótboltinn fari vel saman

Kamel er Dani af írökskum uppruna og samdi við Keflavík í vetur. Hann hefur nú fastað síðan 22. mars síðastliðinn, þegar Ramadan hófst, en hvernig gengur það fyrir sig?

„Það byrjar frá sólarupprás til sólarlags, þá föstum við. Enginn matur og engir drykkir. Fólk heldur að þetta snúist bara um það en það er meira. Allur líkaminn og öll sálin fastar, hugurinn og hjartað. Hvað get ég sagt? Maður kemur hreinn út úr þessu þegar það er búið. Svo þetta er mjög áhugavert,“ segir Kamel í samtali við Stöð 2.

Erfitt fyrst en eykur svo á kraft

En hvaða áhrif hefur það á hann sem íþróttamann?

„Í byrjun er ég dálítið slappur og þreyttur, svimar kannski aðeins fyrstu dagana. En eftir það er ég endurnærður, mér finnst ég kraftmeiri og mér líður vel. Það er skrýtið að segja að manni líði vel þegar maður hvorki borðar né drekkur þennan mánuð en mér líður í rauninni vel,“ segir Kamel sem jafnframt fagnar þá nýju reglunum sem kynntar voru í gær.

„Þær hafa mikla þýðingu, þær hjálpa mikið og þær draga úr álaginu á leikmönnunum. Þeir þurfa ekki rjúka burt í miðjum leik til að fá sér eitthvað að borða eða drekka. Það mun hjálpa þeim mikið í framtíðinni. En það eru ekki svo margir dagar eftir af þessum föstumánuði en í framtíðinni mun þetta hjálpa mörgum leikmönnum.“ segir Kamel.

Fær mikinn stuðning

Hann segir þá liðsfélaga sína og starfslið Keflavíkur hafa stutt sig vel síðustu vikur.

„Já, þeir hafa sýnt mér mikinn stuðning. Liðsfélagar, þjálfarar og allir í kringum félagið hafa sýnt mér mikinn stuðning og ég er þakklátur fyrir það.“

Þrátt fyrir föstuna skoraði Kamel og var besti maður vallarins er Keflavík vann 2-1 sigur á Fylki í fyrstu umferð Bestu deildarinnar síðustu helgi. Hann fagnar því að hafa komist vel af stað.

„Auðvitað. Það vilja allir byrja vel. Það er enn sérstakara þegar það er nýtt félag og ný deild að byrja vel en við stóðum okkur vel. Við reyndum að gera okkar besta og okkur tókst það að lokum. Það mikilvægasta er að vinna og ná árangri.“

Kamel var þá býsna kalt á meðan viðtal var tekið við hann í stillu og fimm gráðu hita. Hann ber Íslandi þó vel söguna.

„Ísland er sérstakt. Ég kann vel við það. Það er öðruvísi. En ég kann vel við mig. Þetta er ný reynsla fyrir mig. Ég hef bara heyrt góða hluti um landið og deildina.“ segir Kamel.

Viðtalið má sjá í spilaranum að ofan og í þeim neðri má sjá helstu atvikin úr leik Keflavíkur við Fylki síðustu helgi.

Keflavík mætir KR í annarri umferð Bestu deildar karla á morgun klukkan 14:00. Leikurinn verður sýndur beint á Stöð 2 Besta deildin.