Dæsti og bað dómarann um að tala hærra

Magnús Aron er ákærður fyrir að hafa veist að nágranna sínum Gylfa Bergmann Heimissyni. Fyrst á stigagangi hússins við Barðavog og svo utan við húsið með þeim afleiðingum að Gylfi lést af áverkum sínum á vettvangi.

Geðlæknir var fenginn til að taka afstöðu til þess hvort Magnús Aron væri sakhæfur. Mat hans var að geðheilbrigði Magnúsar Arons væri þess eðlis að hann hafi ekki verið haldinn neinum þeim einkennum, sem talin eru upp í ákvæðum almennra hegningarlaga um sakhæfi, á verknaðarsstundu. Því kæmi ekkert í veg fyrir að refsing gæti borið árangur verði hann fundinn sekur.

Magnús Aron hefur sætt gæsluvarðhaldi frá því hann var handtekinn í júní í fyrra. Hann kom í dómsalin í umsjónum tveggja lögreglumanna í morgun. Hann dæsti þegar hann settist niður, leit á fjölmiðla og dæsti aftur.

Aðstandendur Gylfa Bergmanns eru viðstaddir aðalmeðferðina sem er áætlað að taki allan daginn í dag og haldi svo áfram á morgun og föstudag.

Magnús Aron verður fyrstur spurður spurninga af saksóknara og verjendum sínum í dag. Hans fyrstu viðbrögð í dómsal voru að biðja dómara í málinu um að tala hærra.

Fjallað verður um vitnisburð Magnúsar Arons á Vísi þegar hann hefur lokið máli sínu.

Neitar sök í málinu

Magnús Aron neitar sök í málinu og í gæsluvarðhaldsúrskurði héraðsdóms frá í fyrra kom fram að hann hefði sagt við yfirheyrslu lögreglu að Gylfi hafi komið til sín umrætt kvöld og viljað ræða við sig. Taldi hann Gylfa hafa verið ógnandi og hafa ætlað að ryðjast eða brjótast inn í íbúðina. Magnús hefði hindrað Gylfa í því og í kjölfarið hafi komið til átaka þeirra á milli frammi á gangi og í stigahúsinu

Magnús sagði mikið hafa gengið á og Gylfi hafi haft yfirhöndina og slegið hann ítrekað í andlitið.

Þegar út var komið hafi hann fljótlega náð að yfirbuga Gylfa og sparkað ítrekað í andlit hans þar sem hann lá á jörðinni. Loks hafi hann hætt og þá ákveðið að hringja eftir aðstoð lögreglu og sjúkraliðs en síðar verið handtekinn við komu lögreglu.

Talinn afar hættulegur

Í úrskurði héraðsdóms sagði að Magnús Aron ætti sér sögu hjá lögreglu vegna ofbeldisfullrar hegðunar. Hann hefði jafnframt hlotið dóm fyrir líkamsárás og barnaverndarbrot. Að mati lögreglu væri hann afar hættulegur.

Með vísan til rannsóknargagna og alvarleika þess brots sem rökstuddur grunur væri um að Magnús Aron hefði framið, var fallist á að gæsluvarðhald væri nauðsynlegt með tilliti til almannahagsmuna. Dómstólar hafa endurtekið fallist á beiðni lögreglu um gæsluvarðhald.

Þá sagði jafnframt í úrskurðinum að það stríddi gegn réttarvitund almennings ef maður sem væri undir sterkum grun um að hafa framið árás sem mannsbani hefði hlotist af gengi laus á meðan málið væri til meðferðar hjá lögreglu og eftir atvikum dómstólum.