Neyðarstigi Almannavarna lýst yfir vegna flóðanna

Gunnar Reynir Valþórsson skrifar 27. mars 2023 08:43

Annað flóðið félkk á Starmýri og hitt í sjó fram við Strandgötu. Loftmyndir

Neyðarstigi Almannavarna hefur verið lýst yfir vegna snjóflóðanna sem féllu í Norðfirði í morgun. Hjördís Guðmundsdóttir upplýsingafulltrúi Almannavarna segir að verið sé að reyna að ná yfirsýn yfir ástandið.

„Það er verið að rýma á Norðfirði og á Seyðisfirði og búið að opna fjöldahjálparstöðvar á þessum tveimur stöðum,“ segir Hjördís. Hún segir að fyrra snjóflóðið hafi fallið um sexleytið í morgun en það fyrra um klukkan sjö. Seinna flóðið féll í byggð og lenti á fjölbýlishúsi í bænum sem er ástæðan fyrir því að neyðarstig var sett á.

„Mér heyrist að búið sé að ná sambandi við alla sem lentu í þessu flóði en við erum enn að reyna að ná utan um það þannig að við getum lítið sagt á þessari stundu.“

Hjördís tekur þó fram að ekkert hafi heyrst af meiðslum á fólki en Jón Björn Hákonarson bæjarstjóri sagði þó í morgunútvarpi RÚV að einhverjir hafi orðið fyrir smávægilegum meiðslum.

Hjördís segir einnig að nokkuð víst sé hversu margir voru í húsinu en að sú tala verði ekki gefin upp að svo stöddu. "Sem betur fer voru þetta þó ekki margir aðilar.“

Engin flóð á Seyðisfirði

Hvað varðar Seyðisfjörð segir Hjördís að ekki sé vitað af flóðum þar, en í ljósi þess að hættustig Veðurstofu hafði verið gefið út fyrir þessa tvo þéttbýlisstaði áður en flóðin féllu í Norðfirði hafi verið ákveðið að rýma hús þar einnig.

Fjarðabyggð Snjóflóð í Neskaupstað Snjóflóð á Íslandi Almannavarnir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.