Segir methagnað uppskeru af uppbyggingu virkjana

Kristján Már Unnarsson skrifar 21. febrúar 2023 12:36

Hörður Arnarson, forstjóri Landsvirkjunar, kynnir ársreikninginn á fundi með fréttamönnum og fulltrúum greiningadeilda fjármálastofnana í morgun. Egill Aðalsteinsson

Landsvirkjun skilaði fjörutíuogfimm milljarða króna hagnaði á síðastliðnu ári og leggur stjórn fyrirtækisins til að tuttugu milljarða króna arður verði greiddur í ríkissjóð, fimm milljörðum meira en fjárlög gera ráð fyrir. Forstjórinn segir þetta uppskeru virkjanauppbyggingar síðustu áratuga en endursamningar við stóriðju séu þó stærsti áhrifaþátturinn í góðri afkomu.

Afkoma Landsvirkjunar hefur aldrei verið betri í 58 ára sögu þess fyrirtækisins, samkvæmt ársreikningi sem birtur var í gær. Forstjórinn, Hörður Arnarson, kynnti fréttamönnum og fulltrúum fulltrúum greiningadeilda fjármálastofnana afkomuna í morgun, en rætt var við Hörð í hádegisfréttum Bylgjunnar:

„Við erum á margan hátt að uppskera, bæði frá þessum virkjunum sem hafa verið byggðar á síðustu 58 árum, og njótum mjög góðs af í dag, en einnig þessari vegferð sem við hófum fyrir tíu árum síðan að endursemja við okkar viðskiptavini. Það er að skila sér í langbesta rekstrarári Landsvirkjunar,“ segir Hörður.

Í kynningu Landsvirkjunar kemur fram að stóriðjan borgar núna raforkuverð sem er sambærilegt við það sem er í helstu viðmiðunarlöndum, eins og Kanada og Norður-Noregi. Meðalverð til stórnotenda án flutnings hafi aldrei verið hærra, eða tæplega 43 dollarar á megavattstund.

Meirihluti tekna Landsvirkjunar frá stóriðjunni er tengdur álverði og raforkumarkaði Norðurlanda og þar hefur verð verið í hæstu hæðum.

„Ytri aðstæður á síðasta ári voru hagstæðar. Bæði gekk okkar viðskiptavinum vel og voru að fullnýta samningana. Virkjanirnar gengu líka vel og verð á hrávörumörkuðum há.

En svona meginástæðan fyrir þessum mikla viðsnúningi eru endursamningar. Við höfum samið við flestalla okkar viðskiptavini upp á nýtt. Þeir samningar er núna orðnir virkir. Og það er kannski stærsti áhrifaþátturinn í þessari góðu afkomu sem við sjáum, bæði 2021 og 2022,“ segir Hörður Arnarson, forstjóri Landsvirkjunar.

Landsvirkjun Orkumál Áliðnaður Vatnsaflsvirkjanir Jarðhiti Orkuskipti Loftslagsmál

Tengdar fréttir

Leggja til tuttugu milljarða arðgreiðslu

Afkoma ársins var sú besta í sögu Landsvirkjunar. Hagnaður fyrir óinnleysta fjármagnsliði, sem er sá mælikvarði sem við lítum helst til þegar afkoma fyrirtækisins er skoðuð, var 44,9 milljarðar króna og hækkaði um ríflega 72% á milli ára í bandaríkjadal talið. Þetta kemur fram í ársreikningi Landsvirkjunar.

20. febrúar 2023 15:51

Landsvirkjun áformar meiri orkuöflun á fjórum stöðum

Ný orkuöflun Landsvirkjunar stefnir í að verða mjög umfangsmikil á næstu árum, að sögn forstjórans. Auk Hvammsvirkjunar áformar fyrirtækið stækkun virkjana á Þeistareykjum og við Sigöldu sem og vindorkulund við Búrfell.

6. desember 2022 11:12

Segir síðasta ár hafa verið gott fyrir álverin en þetta ár verði enn betra

Rekstur áliðnaðarins hérlendis hefur aldrei gengið eins vel og nú. Þrátt fyrir að verð á áli hafi á síðustu vikum sigið niður spáir forstjóri stærsta álversins, Alcoa Fjarðaáls, því að þetta ár verði ennþá betra en það síðasta.

6. ágúst 2022 22:10

Miklar hækkanir á álverði skilar Norðuráli hagnaði upp á tíu milljarða

Miklar verðhækkanir á álverði á heimsmarkaði skiluðu sér í því að tekjur Norðuráls á Grundartanga jukust um 39 prósent á árinu 2021 og námu samtals 791 milljónum Bandaríkjadala, jafnvirði um 103 milljarða króna. Mikil umskipti voru í afkomu álversins sem hagnaðist um 79,4 milljónir dala eftir skatta borið saman við tap upp á tæplega 9 milljónir dala á árinu 2020.

16. apríl 2022 12:55

Heimsmarkaðsverð á áli orðið ævintýralega hátt

Heimsmarkaðsverð á áli fór í gær í 3.850 dollara tonnið. Þetta er langhæsta álverð sögunnar. Álmarkaðir hafa heldur róast framan af degi og verðið sigið niður, fór niður í 3.740 dollara í morgun og var komið niður undir 3.500 dollara um hádegisbil.

8. mars 2022 12:24

Mikill gleðidagur í Straumsvík og léttir að óvissu um ÍSAL var eytt

Óvissu um framtíð álversins í Straumsvík var eytt í dag með nýjum raforkusamningi Landsvirkjunar og Rio Tinto og verður álframleiðslan sett á fulla ferð að nýju. Rannveig Rist forstjóri segir þetta mikinn gleðidag.

15. febrúar 2021 20:50

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.