Erlent

Neitar Schiff og Swalwell um sæti í leyniþjónustunefnd

Samúel Karl Ólason skrifar
Kevin McCarthy, forseti fulltrúadeildarinnar.
Kevin McCarthy, forseti fulltrúadeildarinnar. AP/Jose Luis Magana

Kevin McCarthy, forseti fulltrúadeildar Bandaríkjaþings, segist ætla að meina tveimur þingmönnum Demókrataflokksins aðgang að þingnefnd þar sem fjallað er um málefni leyniþjónusta Bandaríkjanna. Hann segist ekki vera að hefna sín, heldur sé ástæðan sú að þingmennina skorti heilindi.

Um er að ræða þá Adam Schiff, sem stýrði nefndinni á síðasta kjörtímabili og er einn af leiðtogum Demókrataflokksins, og Eric Swalwell, sem sat í nefndinni á síðasta kjörtímabili. Hakeem Jeffries, leiðtogi Demókrataflokksins í fulltrúadeildinni, sendi McCarthy bréf um síðustu helgi og bað um að Schiff og Swalwell yrðu áfram í nefndinni og sagði enga ástæðu til að hafna þeim.

McCarthy svaraði Jeffries í gær og sagðist ekki ætla að skipa þingmennina í nefndina. Forseti þingdeildarinnar skipar einn í leyniþjónustunefndina, öfugt við flestar aðrar nefndir.

Á síðasta kjörtímabili ráku Demókratar þingmennina Marjorie Taylor Greene og Paul Gozar úr þingnefndum vegna ummæla þeirra og birtinga á samfélagsmiðlum þar sem þau voru sögð hvetja til ofbeldis gegn þingmönnum Demókrataflokksins.

Sjá einnig: Ætla að víta þingmann sem birti myndband af sér að drepa þingkonu

McCarthy segist samkvæmt AP fréttaveitunni ekki vera að hefna sín vegna brottrekstur Greene og Gosar úr þingnefndum, þrátt fyrir að hann hafi á síðasta kjörtímabili ítrekað hótað því að hefna sín þegar Repúblikanar tækju völdin á þinginu. Hann segir þetta mál varða þjóðaröryggi Bandaríkjanna og að Schiff og Swalwell gætu fengið sæti í öðrum nefndum.

McCarthy hefur um nokkuð skeið verið mjög gagnrýninn á Schiff vegna aðkomu hans að ferlinu þegar Donald Trump, fyrrverandi forseti, var fyrst ákærður af þinginu fyrir embættisbrot. Hann hefur ítrekað haldið því fram að Schiff hafi sagt bandarísku þjóðinni ósatt um Trump.

Þá hefur McCarthy ítrekað sagt ósatt um Swalwell og málefni kínverskrar konu sem grunuð er um njósnir í Bandaríkjunum. Kona að nafni Christine Fang vann sem sjálfboðaliði við framboð Swalwell árið 2012 og svo aftur árið 2014.

Sjá einnig: Meintur njósnari sængaði hjá minnst tveimur borgarstjórum

Árið 2015 vöruðu starfsmenn Alríkislögreglu Bandaríkjanna (FBI) Swalwell við því að hún væri grunuð um njósnir og í kjölfarið sleit hann öll tengsl við hana.

Repúblikanarnir John Boehner, fyrrverandi þingforseti, og Devin Nunes, og fyrrverandi formaður leyniþjónustunefndarinnar, vissu um málið og höfðu ekkert út á veru Swalwell í nefndinni að setja. Engar upplýsingar hafa litið dagsins ljós sem benda til þess að Swalwell hafi nokkuð rangt gert í máli hins meinta njósnara.

Swalwell segir að frá því McCarthy byrjaði að segja ósatt um sig og hinn meinta njósnara hafi morðhótunum gegn honum og fjölskyldu hans fjölgað gífurlega.

McCarthy hefur einnig heitið því að reka þingkonuna Ilhan Omar úr utanríkismálanefnd þingsins. Þingmennirnir þrír hafa gefið frá sér yfirlýsingu um að aðgerðir þingforsetans gegn þeim grafi undan heilindum þingsins. Þeir segja þær til komnar vegna þess að McCarthy hafi neyðst til að gera samkomulag um pólitískar hefndir gegn þeim við öfgafyllstu meðlimir þingflokks Repúblikanaflokksins.

Þeir meðlimir gerðu McCarthy erfitt um vik með að verða þingforseti. Þau þvinguðu hann meðal annars til að samþykkja reglubreytingu um að nú þurfi bara einn þingmann til að kalla fram atkvæðagreiðslu um að víkja honum úr embætti.


Tengdar fréttir

Leynileg skjöl fundust á heimili Pence

Tólf leynileg skjöl fundust við leit á heimili Mike Pence, fyrr­ver­andi vara­for­seta Banda­ríkj­anna, í Indiana fylki í Badnaríkjunum. Lögfræðingur Pence fann skjölin og hafa þau nú verið afhent alríkislögreglunni. 

Enn finnast leynileg skjöl hjá Biden

Rannsakendur Alríkislögreglu Bandaríkjanna (FBI) fundu sex skjöl sem merkt eru sem leynileg gögn á heimili Joe Bidens, forseta Bandaríkjanna, í Delaware við húsleit þar á föstudaginn. Hald var einnig lagt á handskrifuð minnisblöð forsetans en óljóst er hvort skjölin séu enn leynileg.

Skilgreina Wagner sem alþjóðleg glæpasamtök

Yfirvöld í Bandaríkjunum ætla að skilgreina rússneska málaliðahópinn Wagner Group sem alþjóðleg glæpasamtök. Í kjölfar þess verður hópurinn beittur viðskiptaþvingunum sem takmarka eiga umsvif hópsins á heimsvísu.

Trump og lögmaður hans dæmdir til greiða milljón dala í sektir

Alríkisdómari í Bandaríkjunum hefur skipað Donald Trump, fyrrverandi Bandaríkjaforseta, og einum lögmanna hans að greiða sameiginlega nærri milljón Bandaríkjadala í sektir fyrir tilhæfulausa málsókn þar sem Hillary Clinton, landsnefnd Demókrataflokksins og aðrir meintir óvinir Trump voru sakaðir um umfangsmikið samsæri gegn honum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.