Axarvegi frestað um óákveðinn tíma vegna þensluniðurskurðar

Kristján Már Unnarsson skrifar 4. janúar 2023 22:33

Svona sér Vegagerðin fyrir sér að Axarvegur upp úr Berufirði verði skorinn inn í Vagnabrekku. Vegagerðin

Uppbygging heilsársvegar um Öxi, milli Egilsstaða og Djúpavogs, sem til stóð að hefja í vor, er komin í salt vegna niðurskurðar í vegagerð. Hvenær ráðist verður í verkið skýrist væntanlega í vor við gerð næstu fjármálaáætlunar ríkisstjórnarinnar.

Fjallað var um Axarveg á sunnanverðum Austfjörðum í fréttum Stöðvar 2 en fjallvegurinn liggur milli Skriðdals og Berufjarðar. Um hann liggur stysta leiðin milli Fljótsdalshéraðs og Djúpavogs. Þarna er núna hlykkjóttur malarvegur sem lokaður er yfir vetrarmánuði.

Hér sést hvernig ný veglína Axarvegar er hugsuð við Vinárneshjalla. Berufjarðará til vinstri.Vegagerðin

Uppbygging hans sem tveggja akreina heilsársvegar með bundnu slitlagi hefur lengi verið draumur Austfirðinga, sérstaklega þó íbúa sveitarfélaganna sem núna mynda Múlaþing. Enda styttir vegurinn ferðatímann milli Djúpavogs og Egilsstaða um fjörutíu til fimmtíu mínútur, miðað við að aka um firðina eða um Breiðdalsheiði.

Ný veglína upp á Öxi í botni Berufjarðar við Bunkuvelli. Núna liggur vegurinn austan Berufjarðarár.Vegagerðin

Til að koma verkinu í gang voru Alþingi og ríkisstjórn búin að skilgreina það sem samvinnuverkefni, ásamt fimm öðrum. Hafði Vegagerðin í fyrra gefið það út að vegurinn um Öxi yrði boðinn út á árinu 2022. Það ár er núna liðið.

„Við vorum í raun og veru langt komin með útboðsgögn þar til að hefja það ferli,“ segir Guðmundur Valur Guðmundsson, framkvæmdastjóri þróunarsviðs Vegagerðarinnar.

Ekkert bólar á útboðinu. Alþingi og ríkisstjórn skáru nefnilega tíu milljarða króna af nýframkvæmdum í vegagerð á þessu ári. Og þótt gert væri ráð fyrir einkafjármögnun Axarvegar og vegtolli átti ríkið að koma með mótframlag.

Svona er nýr Axarvegur hugsaður í Vagnabrekku.Vegagerðin

„Það voru lækkuð framlög til vegagerðar, flutt til 2024, út af þensluáhrifum meðal annars. Og að einhverju leyti bitnar það kannski á Öxi.

En við erum að vinna af fullum krafti í undirbúningi þar, bæði að hönnun og landakaupum og öllu sem tilheyrir þar.

Ný veglína Axarvegar við Innri-Viná.Vegagerðin

Þannig að væntanlega næsta vor, þá mun það skýrast í tengslum við fjármálaáætlun, sem liggur fyrir næsta vor, fjármálaáætlun til fimm ára, hvernig fjármögnun á nýjum vegi um Öxi verður,“ segir Guðmundur Valur.

Uppbygging vegarins var ein helsta forsenda sameiningar Djúpavogs, Fljótsdalshéraðs, Seyðisfjarðar og Borgarfjarðar eystri í Múlaþing en hún var samþykkt í íbúakosningu haustið 2019.

Svona eiga ný gatnamót Axarvegar og Breiðdalsvegar að líta út efst í Skriðdal.Vegagerðin

Vegagerðin hafði stefnt að því að framkvæmdir við Axarveg hæfust vorið 2023 og að verkið tæki þrjú ár. En hvenær telja Vegagerðarmenn núna að verkið gæti hafist?

„Ég held að það bara, eins og fleiri verkefni hjá okkur, varðandi samgönguáætlun og í vegagerð, byggir mikið á hvernig fjármálaáætlunin muni líta út fyrir 2024 til 2028. Það er kannski bara ótímabært að tjá sig eitthvað um það fyrr en það bara liggur fyrir,“ svarar framkvæmdastjóri þróunarsviðs Vegagerðarinnar.

Ný veglína Axarvegar innst í Berufirði við Víðineshjalla.Vegagerðin

Vegagerð Samgöngur Múlaþing Ríkisstjórn Katrínar Jakobsdóttur Ferðamennska á Íslandi Efnahagsmál Fjárlagafrumvarp 2023

Tengdar fréttir

Tíu milljarða vantar í fjárlög upp í loforðin í vegagerð

Tíu milljarða króna gat er í nýsamþykktum fjárlögum næsta árs til að unnt verði að standa við þau fyrirheit sem gefin voru í samgönguáætlun fyrir síðustu kosningar. Breikkun Suðurlandsvegar í útjaðri Reykjavíkur er meðal þeirra verkefna sem skorin verða niður.

21. desember 2022 10:20

Innviðaráðherra segir aðgerðir gegn þenslu ekki bitna á framkvæmdum

Ríkisstjórnin boðar aðgerðir til að mæta þenslu í hagkerfinu. Innviðaráðherra segir að þetta muni ekki bitna á neinum framkvæmdum.

8. júní 2022 22:20

Ölfusárbrú og Axarvegur á leið í einkaframkvæmd

Smíði nýrrar Ölfusárbrúar og lagning Axarvegar eru að fara í útboðsferli sem einkaframkvæmd og mun Vegagerðin í þessum og næsta mánuði óska eftir áhugasömum bjóðendum. Ný brú á Hornafjarðarfljót er þó komin lengst slíkra verkefna en tilboð verða opnuð síðar í þessari viku.

14. febrúar 2022 22:05

Heilsársvegur yfir Öxi efstur á óskalistanum

Betri veg yfir Öxi var svarið þegar Djúpavogsbúar voru spurðir í þættinum Um land allt á Stöð 2 um hvað helst þyrfti að bæta til að styrkja samfélagið á Djúpavogi.

6. mars 2020 17:12

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir