Matreiðsluþátturinn Helvítis jólakokkurinn verður sýndur vikulega fram að jólum. Líkt og fyrri þættir Ívars eru þeir fyrir þá sem vilja ekkert kjaftæði, bara elda bragðgóðan mat. Þriðja þáttinn má sjá í spilaranum hér fyrir neðan en uppskriftirnar má finna neðar í fréttinni.
Helvítis lambahryggurinn
- 1 léttreyktur lambahryggur frá KEA
- Vatn
- 1 krukka Helvítis eldpiparsultan Jalapeno og Basil
Aðferð:
Sjóðið í steikarpotti með fituhliðina niður í ofni stilltum á 200° í 20 – 30 mín. Hellið vökvanum af og látið standa á fati í 20 mín. Setjið hrygg aftur í steikarpott, fituhliðina upp. Makið Helvítis eldiparsultunni á allan hrygginn. Sleikið rest af puttum…. Setjið inn í ofn á 180° í 20 mín. Hvílið í 15 mín, skerið og njótið.
Jóla-Sólberjaperur
- 3 perur skrældar,skornar í helming og kjarnhreinsaðar
- 200 ml rauðvín
- 300 ml sólberjasafi
- 1 tsk salt
- 2 kanilstöng
- 2-3 negulnaglar
- 3 Kardimommur
- 4 ræmur af sítrónuberki
- 300 g púðursykur
Aðferð:
Sjóða allt saman í 40 mín á vægum hita. Hellið vökva frá.
Sætkartöflumús með bökuðum hvítlauk
- 2 sætar kartöflur
- 1 heill hvítlaukur
- 4 msk smjör
- Salt
- Pipar
Aðferð:
Bakið kartöflur í ofnskúffu ásamt hvítlauk í 60 mín á 200°. Látið standa í 30 mín á borði. Fjarlægið hýði af kartöflum og setjið í skál. Kreistið hvítlauk útí og stappið með smjöri,salt og pipar.
Rósakál hjúkkunnar
- 1 poki rósakál
- 12 sneiðar beikon
- Pipar
Aðferð:
Hreinsið rósakál og skerið beikon í bita. Steikið beikon í 5-10 mín. Bætið rósakáli á pönnu og steikið allt saman þangað til kálið er eldað í gegn. Kryddið með pipar.
Jólasósa a la Finnsson
- 1 box sveppir
- 40 gr kóngasveppir
- ½ rauðLaukur
- ½ tsk timjan
- 4 msk smjör
- 200 ml Sherry
- 400 ml nautasoð
- Pipar
- Salt
- 500 ml Rjómi
Aðferð:
Setjið smjör í pott og bræðið. Skerið sveppi og saxið lauk, kryddið með timjan, salti og pipar og steikið upp úr smjöri í 10 – 15 mín. Hellið sherry saman við og kveikið í alkahólinu með kveikjara. Þegar hætt er að loga skal sjóða niður um 30%. Hellið soði saman við og sjóðið aftur niður um 50%. Hellið rjóma saman við og sjóðið á vægum hita um helming og þegar sósan er búinn að ná réttri þykkt eru komin jól.
