Desemberspá Siggu kling - Tvíburi

Þú ert ósjálfrátt að aftengja þig við hið gamla, gamlar hindranir og fólk og ert tilbúinn að bjóða heim til þín nýju lífi.

Það eru misjafnir dagarnir, stundum er mótvindur. En ef þú skoðar vel er oft meðvindur og þú feykist áfram án þess í raun að hafa stjórn á öllu því ferli sem er að gerast hjá þér. Þetta er svo merkilegur tími, því þetta er tíminn sem mótar þig styrkir og bætir og segir þér að EKKERT sé ómögulegt.

Það er fullt tungl í Tvíburamerkinu þann áttunda desember og það gefur þér sérstaka orku og mátt til þess að efla óskir þínar og bæta á bucket listann þinn, því það eru ekkert nema töfrar í kringum þetta tungl.

Það verður afgerandi sterk orka yfir því sem þú ákveður að gera á þessu tímabili, en það er líka mikilvægt að bjóða ekki leiðinlegum hugsunum inn. Því að þetta tungl er magnari sem getur allt eins magnað upp þunga hugsun, svo hentu þeim í ruslið.

Þú átt það til að dæma fólk of fljótt, mynda þér skoðun án þess að gefa séns. Hafðu það að leiðarljósi að halda þá þeim skoðunum fyrir þig. Því að það eru svo margir í kringum þig sem munu koma þér á óvart og nákvæmlega þeir sem þú bjóst alls ekki við að væru englar í myrkrinu.

Þú hneigist til margvíslegra starfa og helst viltu sinna þeim öllum á sama tíma. Þú verður svo hundleiður á að vinna alltaf sama verkið. En allt er þetta að kenna þér eitthvað og kemur þér áfram til að taka að þér stærri og stærri verkefni og setja meira fjör í þetta leikrit sem kallast lífið.

Knús og kossar, Sigga Kling